Yi, na meimchir tepseter ka

~  I. Meren Lemtur, Tzüdikong Town.

Oh! Ashikülak Yi, na koda tesempatsü, nü den teti rarabangsen lir.
Na alidak kodanga sünepa mali, ozü Naga nungertem alar tiai yoker, na ajanga,
Nai ozü Naga nungertem arishi yakta tembangdaktsür,
Senti taküm jendi molumi-i yoker, na ajanga.

Kinüngtsü aika amitsür kümdaktsür, nü jakla tamajung ajanga,
Akhümket, tashi tait tebu jentisa jenti anojungi arishi temogo, na ajanga,
Temeim jabaso, jalatem aika tebu mali kümdaktsür, nü tasa tamajung ajanga,
Taküm nung lia aotsü teimla ajak samadaktsür, nü sentong tamajung agi.

Jabaso, jalatem aika amitsür jabaso jala kümdaktsüogo, na taochi makaba Yi,
Akümli tepiyong Ojala shisabulu khuret ajanga nüktzü yimdaktsüba, temeim maketba Yi,
Meimchirtem tia tajung ajak na ajanga samadaktsür, nü ashikülak mapa ajanga,
Na ozü lima nung yama liasübo, tanü ozü lima tangar lima ama kümer lila.

Tanü ozü lima nung ochishiba samaa tokogo, kinük kisang ajak nung,
Tarurtem ajak mita sang soa yur nai ata alir, aser tekülak sang nung pudaktsür,
Ochimashiba rongsen tali soyapokyaa aoer, na teyazür tulitiba Yi,
Ochishir tashi agi makoker, nü temenen mapa tashi tulutem.
Ozü Naga nungertem tulursa tulur jendi, taküm jenti nai tepsetogo,
Sorkar mapa nung meren-merena pei office nung mena alirtem,
Jenti nai tepsetogo, ano jentisa jenti leper leni nai anir odagi,
Alima nung nisung tepseter tulutibaji na, Yi lir.

Oh! Yi, nü dak yimden lokdi ozüng hau ta tashi angaba khenyongi mali,
Na ozü tsükchir tulutiba, na aru mita nokdakertem, nü tashi agi koda puadoker,
Iba yagi tanü tashi ozü lima nung na menokdangteter, na koda renloka aor,
Joko ozü lima ya Nagaland for Christ ta mesüteterji, Nagaland for Wine ta asütsü südi na!!!

Oh! Yi ayokertem, na koda rakzükraktemer ashikülak nisung Na ayatai.
Na nisung tepseter tulutiba, nü kiji nisung jenti molumi-i yokba kikümbang,
Nai rongsen arishidang nisung taküm jenti Yi lar kümdaktsür.
Nü tenüng tajungtemji itemi lir. Na auer, na nisung tepseter, ashikülaker, mojingi teti nü dak temulung asür.
Oh! Yi ayoker nai ya shisadangang, nisungtem tepelatiba anogoji na asü nüji asütsü.
Na ayatai, ayatai ayatai!

You must be logged in to post a comment Login