Yi tongpang

Shitakba bilemdangdi süra Nagaland nung yi tongpang ya arogo nunger tongpang masü saka Khristan pur kija taküm shia tongpang lir. Ajisüaka, aiben asenoki iba tongpang nung tamakok reprangtet dang arogo nunger tongpang amai bilema NBCC aser ABAM aitsür. Külenbo, ajia shitak kechiaser ABAM-i tongti shilem agia NBCC tenüng nung state government den jembia Nagaland nung yi yangluba aser ayokba anendaktsü. Anungji, iba khuretji meteta arogo nungertemia ABAM aser NBCC tenüng nung akok tashi Nagaland nung yi mayoktsü aser majemtsü asoshi nübortem nem tangatetba tajung agüja inyaktsübaji kanga nüngdaker. Iba tangatetba nung arogoi state government den mapang shia mena yi tongpang takok angutsü asoshi shisalemsatepa sentong yanglutsüla. Arogo tenüng nung nübortemi yi meyanglutsü aser mayoktsü nokdakba ya arogo nunger kija aser kibong ajak tajung südaktsünüba agi inyaker. Ajisüaka, kanga tia majung kaji arogo nungerisa yi yanglur, yi ayoker aser yi ajemer. Kasa nisungtem jagi yi yangluba, ayokba aser ajembaji majunga ta meteta dang lir saka tia maka parnoki item mapa nungi mepilatetter. Osang tajung ka angazükbaji, tesem kar nungbo arogo nungertemi yi ayokertem nem tanga business inyaktsü asoshi sen agütsür aser yi ajemertema yi tokdaktsütsü asoshi anepalur. Itemji yi tongpang raraba nung sentong tajung yanglua raraba mapa ka asütsü. Iba ama mapaji sarasadem den külemi maneni inyaka aotsüla. Asenok asoshi yi ya kinü tanur nem teyirutsü oset ka agütsü amai lir. Yi ajemba ajanga asenokbo sensak tiai dang aier, kibong balalulaba dang ataloker aser yi lar kümer kibong aser lokti nem tebilemtsü bener arutsür. Yi ajemer shingaia junger ta ser majemer aser pei chirnurtem dang yi ajemtsü majungshir. Tetezü, tia majung, memetetika jembaa adok dang ashi, yi jemer ajaki temulung nungbo yi toktsüner. Iba ama tachitajemtsü ka süaka nisung yiar aser alar kümdaktsüba chiyongtsü ka kodaser asen lima nung yanglutsü aser ayoktsü ta asenoki bilemdangtsüla. Iba tangatetba nung asenoki taoba hopta nung NBCC-i ano asentenshir Nagaland nung yi anema Liquor Prohibition Act ozüng shitak benshitsü atema sorkar nem takhangba agütsü nunga koma süla (?) ta asüba nung bilemdangogo. Atangji, iba tasüngdangba nung shisalemsatepertemi shisa tajung aika agütsüogo. Item rongnung telangzür kati, “shinga nüngsen magitsü atema NBCC-i tetsütem mapang shia Nagaland gate ajaklen Clean Election tenüng nung süisüponger garitem, tongtibangsa minister-tem süiba mapang nung mita reprangra ajibo shitakba Dry State asütsü menua mali,” ta langzüba nungji tagitsü aser tangatettsü o tongtibang kar keta lir. Clean election takok angutsü asoshia yi ya nokdangtettsüsa tetsürtemi inyaktettsü. Ano, Nagaland nung yi meyanglutsü aser mayoktsü ozüng lateta liaka, mekoktetbaji yi ya kanga tongtibang nisung VVIP aser ano sepai-tem gari nung dang abener. Item garitemji gate nung mesoitetter, anungji itemji soita mittsü atema gate shia nung tetsürtem alitsüla ta nübortemi bilemer. Atangji, tetsürtemia yamaji inyakba nguogo aser inyaktsü bilema lir südi. Ajisüaka, pei lima meima inyakyonga angati nübo tenlaa gate nung yi mita amongtsübaji aikati memongtettsü. Aji oda, mapang mapang shia policetem tasü itdaktsütsü atema watsü mesüra arogotsürtemi iba amaji inyaktsü akok saka tongtibangbajibo gate anükertem policetemi tangatetba tajung agi asüng lanurtem asoshi Naga lima tasen ka yanglutsür ama bilema temulung agüja yi nokdangba mapaji inyaktsüla. Idangji, arogoi mamai parnok tenüng asangtsüla aser sarasademtsütsüla. Arogo nunger asoshi yi meyanglutsü aser mayoktsü ozüng azüngbaji mapa atemer masü saka mapa tenzüker ta bilemtsüla. Iba tongpang nung ya, ni yi meyanglutsü aser mayoktsü ta tenangzüba agitetter kar danga adokra, itemji yi tongpang nung nokinketertem asütsü. Iba sülenji dang arogo anidaktsü aser repranga lia loktiliba tajungba kümadoktsü.