Yihuda nunger bilemteter

Alima ajak tanabuba rara (World War II) mapang nung Yihuda nunger million trok tepsetba bilemteta tanü (Aenjeti/January 27) alima linüktemi ‘International Holocaust Remembrance Day’ ayongzüka amonger. Ajioda tanü Sweden aser Israel densema linük aika nung iba anogo amongtsü. Iba rara mapang nungsa Nazi Germany-i Romani nunger 200,000, matamabensar 250,000 aser kasa o kasa shi nung medemer 9,000 tashi tepseta liasü. 2005 küm Yimpoksü (November) ita mezüngnü United Nations General Assembly senden nung iba anogomongji UN nung züngsem linüktemi amongtsü lemteta liasü, aser iba mapang nungjagi kümshia iba anogomong monga arudar. Iba anogo amongba nükjidong ya, tarutsü nungbo nisung jenti tepsetba tanaben lepshia mataloktsü atema ‘Holocaust’ putiotsü dak sendakba nung educational programs alitsü iba den külemi tamangba yimsü nung ajemdaker tesempa mapa inyakba aitsütsü aser meimchir temeten akhümtsübutsü nükjidong nung amonger. Ano Israel nungbo ‘Holocaust’ bilemteta ‘Yom HaShoah’ nüngja nung National Memorial Day amonger iba den külemi parnoki International Holocaust Remembrance Day-a amonger. Israel nung Ministry of Diaspora Affairs-i küm shia Israel sorkar nem anti-Semitism report agütsür. Iba report nungji tesüiba küm ka tsüngda Yihuda nunger sempaa inyakba tatalokbatem osang aser ibaji anema raraba osang agütsür. Tang tashi nungbo alima putiotsü nung nisung meimchir temeten anema tamajungtiba inyakbaji World War II mapang tatalokba ya asütsü. Nazi Germany indang tongtibangtiba nükjidongji, parnoki Europe lima ajak ramoka yimsü sünüa liasü, aser ibaji ajanga parnoki parnok kübok alirtem ajak anema apuso, talisa Nazi-i Yihuda nungerji Satan ta züngshia Hitler tetuyuba kübok Yihuda nunger reshikangshia tepset tenzük. 2017 küm Anti-Defamation League-i survey ka agia linük 100 shi nungi nisung 53,000 dang asüngdangyaba ajanga bushitetba agi, alima nung nütsüng shilem 54-i dang Yihuda nunger jenti tepsetba putiotsü ‘Holocaust’ ya angashidanga lir, aser joko alima nung tesempa mapa malitsü atema iba otsü ya ajak nem angashidaktsütsü nüngdak, ta metetdaktsü. Tawa Anti-Defamation League-isa ashiba agi, 2017 küm mezüngbuba ita teku nung Yihuda nunger anema inyakba kanga bulua kümogo. Ita teku tsüngda Yihuda nunger anema inyakba tatalokba 1,299 liasü, aser 2016 küm mezüngbuba ita teku nung tatalokba 779 den medemdangra ibaji shilem 67 agi timba akumba liasü. Ajioda tanü tashi alima tesem aika nung Yihuda nunger sempar jenti lir, ajisüaka Tsüngremi shimtetba nüburtemji parnok lir. Linük kanga tila aser nütsüng ishika dang süaka tanübo alimai Israel linük dak kanga ranglokba  aikati shisadanger. Akhidang nungi Israel nung rara balala aika rara-a aruba otsü asenoki Laishiba nung azünger, aji oda kin aikati parnok samatsütsü merangogo. Israel nunger rara atalokba shia nisung aikati, iba ya tatembang anogo anasai aruba temaitsü rongnung ka südi ta bilemer. Akhidang nungi Israel nungeri Egypt, Amalek, Midian, Moab, Philistine, Assyria, Babylon mesüra Persia nunger den raraa aruogo aser tang tashi kidanger linük ka mesüra katibosa tesempa agi Israel samatsütsü meranger.