Yimdong nung light mali !

Yakanü Coimbatore nungi aruba medemer ka Dimapur nung senden ka nung külemi dener külen pa anendaki anir otsüdang mangadoker liasü. Anungji, gari light tsükloker Dimapur yimti yimdong ajanga süidang, pai kanga süngmanga, kechiba yimti yimdong nung ‘Street light mali’ ta asüngdang. Iba tasüngdangba jagi nia kanga aoksadaktsü, kechiyong aonung shia kasa yimti yimdong ajanga süir ser nung paonungjiang, medemersang jagi kechiba street light mali ta asüngdangdangji dang, Dimapur nung street light malibaji tejangjaba metet aser iba aonungjisa Dimapur yimdonga tammangba amai angu. Medemersangi asüngdangbaji langzütsü o maka aküm aser akseta liasü. Aji oda, pa dang hau, ibai onok ochimashiba tamaitsü ta ashitsüba dak alaka tejenbulen mali asü. Iba mapang nungjisa bendanglen tanga yimtitem nung aonung senzüdang street light agi anüngdang anü ama sangwadakja ayaba bilemteta ano tali taakba aküm. Atangji, bendanglen tanga yimti nung senzüdangbo aonung street light sangwa agi kodang anü adoker aser anü air memetetter, aonung o anüngdang na tsüngda kecha tebendang maka, anungji aonung asü , anepdang asü mesüra anüngdangar metettsü atema anütettsü repranga senzütsü kanga nüngdaker. Ibaji dang masü saka tanga yimtitem nungbo street light enokbaji tesangwa asoshi dang masü saka yimti topur jungdaktsütsü enoker, anungji electric yindong agi noksa tapu balala adokdakja yanglur light tapu balala tsükloker. Iba jagi aonung yimti yimdong sangwadaktsüba dang masü saka yindong topur ajungba agi yimti yimdongji kanga temenungratsüka kümdaktsür. Ibaji alima agi kotak mesüka yangluba mapa ka asütsü. Atangji, ni ozü medemersang dang asen lima yimti yimdong nung street light maliba atema ochishia telangzüba agütsü saka temulung nungbo   pa dang asen lima indang tajung langkabosa shinüa bilem. Anungji, bilemdanger, ni pa dang ozü lima nung street light meliaka kecha tetsübutsü mali, tetsür dena yangi ayaterem nung senzüyonga shingaia kecha mashitsü ta ni pa dang akseta bilemba shisatsü to nembanga shir yutsü. Ajisüaka, tema nung aji shir  yutsü dang ashi, kü mulung taroktiba nungbo anisüngzük mali asü. Kü mulung nung ozü medemsangi asüngdangba tasüngdangba to agi tanü tashi meinpronger aser ni tangsa aser tanüsa Dimapur yimti yimdong nung tangar lima nung anguba amaji yindong agi noksa küma yanglur yangji street light tapu balala tsüklokba agi aonung o anüngdang na mebendangtet teti tesanga lidaktsüner. Pa denji aonung mapang tatsükaji gari nung aodang light maliba dang masü saka lenmang tamajung nung auyi ponga pa anendaki anir aoba mapangji ni asoshi maksü ajuruba mapang ka liasü. Iba ama yimdong nung ni kechi koda tangar bendanglen nungi arur medemer anir senzütsü. Parnokji asen lima nung auyi ponga aser lishi mélanga anir senzüdang parnoki asenok indang koma bilema alitsü (?) ta temulung nung kanga tipmatem bilemer. Kenü anogo Dimapur nungsa tanga bendang lima nungi aruba medemertem kar anir lenirtem ki kar sema jajaba sülen, parnoki reprangtetba ka indang ashidang, ” Nagaland nung ya pei alitsü yangluba kibo (private ki) kanga junga yanglur aser pei kima dena kanga merüka topur junga ayur saka yimkong jajaba lenmangbo kangasa majung aser ibaji yanglutsü atema shingaia temulung magütsür amai reprangtetter,” ta shia liasü. Tanü parnoki ashiba otemji bilemtet dang, asenok jakla aser mapa tali jangjashir. Asenok Nagaland nung alir Naga nungertem ya tuluba nungi tilaba tashi yamaisa alinungbo, kenlirbo pei kidang nungi yimdongi adok majungtsü. Tanü asenok mapa aser jakla reprangdangra Naga nunger agi Naga nunger memesük aser Aor agi Aor memesük kümogo. Asenok ki tajung dang, gari tajung dang aser süoshi tajungdang agir saka asenoki yimdong nung street light meinoktetter, yimti nung light yindong ka topur junga mazüngtetter, gari lenmang nung gari jajatsüla masü. Asenok ajaki ni aser ozü jungra ojang ta bilemer, anungji yimkong ajungtsü asoshibo long tilakata shia meindoker aser ayi kata apongteta meindoker. Ajisüaka,a senoki metettsüba kaji, tangar tsüngdang asen lima aser asen taküm akhüm aser nümadangtsübaji asen meyong nija ki aser kima ajungbaji masü saka yimti yimdong topur ajungbaji lir. Tang nungi danga ibaji meteta inyakdi ta ayongzüker.