Yimsüsürtem anisüngzük maka

United States nung taoba tirtem rongnung tang taküm alir parnok pongo longjemer tawa America nung yipru tesashi agi kiojen raksatsür timtema alirtem yaritsü atema senotsü bushiba kenten sentong ka taoba honibar nü ayongzüka akaba jagi, asenok nema shisatsü tajung ka agütsüogo. Menoknok, tzümetsüng aser yipru mopong amala alima lendong tulu agi nisungtem talidaka makatsüsa kiojen raksaja timtem ajurudang nisung ajaki government dak dang rangloker saka pei-ia kechi nung yaritettsü ta asübabo tebilema mebilemer.Talisa yimsüsürtem rongnung, timtem takoksa tulu ajurur alirtemji tekaratiba nung anepalutsü bilemtsü melen, aiben kati ka aitsütepba angashir. Ajisüaka, tang US nung taoba tir pongo, Barack Obama, George W Bush, Bill Clinton, George HW Bush aser Jimmy Carter nungertemi longjemer timtemer asoshi senotsü bushitsütsü atema kenten sentong ka ayongzüka akaba jagi alima ajunga nung yimsüsürtem ajak nem tangatetba tajung ka agütsüogo ta bilemer. US nung taoba tir pongoji yimten telok ka nungi masü saka Democratic Party nungi asem aser Republican party nungi ana lir. Par pongo longjemer America nungertem dang timtema alirtem yaritsü mepishia sangdongba ama, iba sentong ajanga sen dollar million 31 tashi  bendentsüogo. Iba kenten sentong metenzükdang tamasa par US naklu ken atenba mapang taoba tir pongoprongla sabangi tur akümtsübu agüja nokdakba kisüng jagi America nungertem nem timtem mapang nung temulung ka ser külemi yariteptsü tangatetba ka kanga junga agütsütetogo. Iba ama jilu tajungji asenokia ajizüka benshitsüla ta bilemer. Asen lima nungbo yimsüsür tejenpur aser tasenpur ta masü saka government sen alemtsü metetba dak alaka, government senpong nungi masüyonga peisasa senotsü bushiba sentong tajung ayonga nübortem yariba otsübo mali südi. Asenokbo aikati yimsüsüba menden nung alidang pei ajangzüktsü dang bilema inyaktsü aser yimsüsüba menden nungi anenerbo kodanga yimsüsür-a mesüdang amato nübortem nüngdak aser timtem reprangtsü mebilemtetter. Election nung toktepertema tadokertemi adokerbo nübortem anasai marudaktsür aser madokertema election nung nübortem meima jembiba nisung memesük kenyongi nübortem anasai marur. Iba tia nungji alimabo yimsüsür aser tanishirtem agi sünga lir saka nübortem timtem nungbo anepalur mali timtem tia nung kibong aika lir. Alima nung temang junga ali tashibo kodanga anisüngzük (retire) magitsüba mapa ana lir. Ibaji ka Tsüngrem tenzükba mapa aser kaji nübortem tenzükba mapa asütsü. Atangji, yimsüsüba mesüra tenzükba menden nungbo teti mamentsü, saka Tsüngrem aser nisung tenzükba mapa yabo ita sen chia menden nung amendangji dang masü saka  temangi dang melara masü tashi inyaktsüba mapa lir. Tsüngrem aser nisung tenzükba mapa yabo tangar jilu repranga mesüra senotsü dak rangloker inyaktsüba mapa ka masü saka ita sen-a maliyonga tangatetba aser tejangraba agi inyaktsüba mapatem lir. Iba tangatetba aser tejangraba agi yimsüsürtemi yimsüsüba menden nung temendak nunga amuia moi nübortem den lia parnok tenzüktsüla aser menden nungi alur külena nübortem den külemi lia nübortem nüngdak inyaka jajatsütsüla. Tanü US nung taoba tir pongo longjemer nübortem asoshi senotsü bushitsüba amaji asenok yimsüsür tejen aser tasen purtem ajaki inyaktsü ajungshiteptsüla. Joko, asenok asoshia tangbo yimsüsürtemi nübortem meyong senotsü miimzüka agiba putu masü saka yimsüsürtemiang sen talila bushia bener arua nübortem asoshi terenlok inyaktsüba putu lir ta angatetdi. Tangbo, pei constituency nung District Planning & Development Fund mesüra Local Area Development Fund tilalaji mapa meinyaki lemsaa agitsü bilemtsüba putu masü saka tangalen nungi dena bushisema bener arua nübortem anisüngzüka akümketketa lidaktsütsüba putu lir ta angatetdi. Iba tangatetba nung asen lima nunga yimsüsür tejen aser tang teinyakdak purtem ajak asentenshir ano kong aser koma nübortem yaritettsü ta shisadang tenzüktsü junger.