Yimtenren ken o latetra state election atsülangtsüa akok: MP Rio

New Delhi, September 14 (Agencies): Naga yimjung ken o tatembanglen kati aruba mapang Nagaland nung lokti tentet balala nungi lenirtem aser yimtenren lenirtemi, Naga yimtenren ken o latetra 2018 küm March ita nung agitsü aliba assembly election atsülangtsüa akok, ta ashir.
Osangbener den jembidang Nagaland nung taoba Chief Minister aser tang Lok Sabha züngsem, Neiphiu Rio-i, “Assembly election magidang Naga yimtenren ken o latetra mapang tatsüka atema interim government alitsü, kechiyong aika ataloktsü aser latettsü. Iba sülen ang taruba election atema jembitettsü,” ta metetdaktsü.
Naga nungeri küm 60 tashi yimtenren ken o latettsü atema inyaka aruba ya 2017 küm tatembang tashi nungbo tatem küma latettsü ta aikati imlar. Interim government ka ajanga dang state nung yimsüsübaren aser yimtenren tiptema latetba nung yaritsü ta jembir.
Naga nungertemi kechi südir süaka telatetba ka aginer, ta shia Rio-i, pai Parliament nunga aiben, Centre sorkari ken o jembitsüla aser taruba assembly election matongdangsa ken o latettsüla ta shiogo, ta metetdaktsü.
Taoba CEC-i ashiba agi, election atsülangtsüji temepishiba ka ajanga dang akoktsü, aser Nagaland Framework Agreement ajanga ibaji Nagaland nungbo akoktsü.
Osangbener den jembidang taoba Chief Election Commissioner, HS Brahma-i, “Telok kati (Centre mesüra state) temepishiba magütsüra Election Commission-i parnok sasa election atsülangtsü makok. Alima lendong mapang mesüra tensa majung nung ang election atsülanger. Ajisüaka tang ken o tejembidak aliba Nagaland nungbo assembly term matonga temepishiba agütsütsü akok,” ta ashi.
Ano Naga Hoho aser Eastern Nagaland’s People Organisation (ENPO) ama lokti tentet tulutemia, sorkari Nagaland atema ken o tajungtiba latetnüra ibaji taruba assembly election matongdang inyaktsüla, ta shiogo.
Osangbener den jembidang Naga Hoho Tir, Chuba Ozukum-i, “Tang tashi nungbo onoki Nagaland nung ano India nunger election agitsü ta meimlar. Tawa Naga yimjung ken o nung interlocutor, RN Ravi-i Nagaland semdangba mapang nunga onoki pa dang, India sorkari telatetba ka agitsü melunga lira ibaji taruba assembly election matongdangsa latettsüla ta jangjajangja shiogo,” ta metetdaktsü.
Chuba Ozukum-i ashiba agi, Naga yimtenren ken o atema telatetba ka magie assembly elections agira ibaji ajanga timtem aika adoktsü.
“Yimjung ken o inyakyim ya maneni melitettsü. Yimjung ken o atema küm 20 ji teperi. Nisungtem kodamasür aser onok süngjema meliteter,” ta paisa ashi.
Ano külen osangbener den jembidang ENPO Tir, Khoiwang Konyak-ia, “Telemtetba ka mesüra election, koba tama arutsüar Naga nungeri repranga atadar. Election tama arura onoki election nung adentsü, saka telemtetba tama arura onoki ajak agi nungittsü,” ta ashi.
2015 küm August 3 nü Naga Framework Agreement agiba sülen tang mezüng assembly election ajurutsü.