Yipru sülen Germany nung train jajatsü tenzüker

Berlin, Jan 19 (Agencies) : Europe anüdoklentip tsütsü yipru mopung tesashi aruagi nisung trok taküm samaba sülen yimtsüng balala tsüngda jajaba train nokdanga liasü saka tanep Hokolbar anepdang nungi Germany nung train jajatsü tenzükogo ta angazüker.
Osang ajanga ashiba agi, linük anüolentip tsütsübo Hokolbar anepdang nungi kanga dang karaa jajaba ICE train akhi ama jajatsü tenzükogo saka tanüngba tesemtem nungbo maneni timtemdagi, ta rail operator Deutsche Bahn-i metetdaktsü.
‘Friedericke’ ta ajaba yipru aitba ajanga company-i kanga karaa jajaba traintem ajak mejajadaktsü.
Mapang tatsüka tongtibang yimtitemi aoba traintem ajak jajadaktsütsü merangdagi aser tanüngba train-temjia hopta tatemlenbo akhi ama jajadaktsütsü, ta Deutsche Bahn-isa metetdaktsü.
Regional train service-ji North Rhine-Westphalia nungbo junga
mejajatet ta angazüker.
Western Europe nung yamala yipru mopung aruba idangji akhidangbo mangashidang saka tawa mapang shia tsüngsang majunger.
Yipru aitdang raksaba kechisarena talisa rail lenmang nung tera dena kakteter zükoka liasüba süngdonglidong aser kongsangtemji rail staff noklang aika adenshir yasüng aonung songtema merükteta inyak aser kari raillenmang raksar aliba yanglushi.
Mopung aonbaji ghonda nung kilometres 130 shi liasü ta asadangtetogo.