Zainab tepsetsang nem tasüba temerenshi pezü agütsür

Lahore, Tsüklai 17 (Agencies) : Tetsür chanu ka dak tashiyim mapa tamajung inyakba aser la tepsetba yutsüba maparen nung ajemdaker, tanü Küptoknü Pakistan court kati nisung ka nem tasüba temerenshi (pezü) agütsüogo.
Taoba ita Pakistan anüdoklen tsütsü Kasur yimti nung arishi küm trok tetsür chanu ka tenüng agi Zainab Fatima Ameen dak mapa tamajung inyakba maparen nung Imran Ali (Küm 24) anema okadak ken o jembia arur tang pa nem iba obendang agütsür.
Iba denji külemi ano Punjab city nunga tetsür tanga tenet dak tashiyim maparen inyakba maparen nunga pa nem temerenshi talila agütsür; par tenet rongnungji pongubo pai tepset. Zainab tepsetba densema ajak agi nisung ti dak mapa tamajung inyak, ta pai okadak nangzüka metetdaktsüogo.
Zainab dak tashiyim mapa inyaker külen la tepseta yutsüba aser nisung amokmerena tashiyim mapa inyakba (terrorism) atema Ali nem tasüba temerenshi pezü agütsür, ta Punjab province nung prosecutor general, Ihtesham Qadir-i metetdaktsü.
Pakistan ozüng nung shia aliba agi, lokti nung aliba nüburtem tsübudaktsüba maparenjia kiralongraba den saku ama amshir.
Masü tashi tepuokdak ayutsü obendang agütsüba denji külemi pai tepsetba mang miima ayuba asoshi senchi densema ajak meyokteper pai sen million 3.2 (US dolar 30,000) menoktsü.
Iba senchi nung jagi Zainab’er kinüngtem nem sen million ka agütsütsü, ta AFP osang den jembidang public prosecutor Abdul Rauf Wattoo-i metetdaktsü.
Tensa majungtsü amai bilemba ajanga Lahore yimti nung aliba Kot Lakhpat jail nung iba ken oji angadanga liasü.
Osangzülurtema tepuokdak nung jagi metre 500 telungzük adena marudaktsü saka asür kingüngertem dang court telung jagi aitdaktsü.
Zainab tetsü Nusrat Bibi-ibo yimjak nung paji tepseta endoktsüla ta takhangba agütsü.
Taoba ita Zainab tepsetba sülen Pakistan ajungalen tashiyim lendong atalok aser yimten lenirtem kar ki nungbo mi senokja liasü.