Zhaleo Rio-i Viphoma nung nüboyim sentong agi

Dimapur, Tsüklai 18 (TYO): Tsüklai (February)17, 2018 nikongdang NDPP candidate, Zhaleo Rio-i pa indang Constituency kübok kanga tezülen aliba yim, Viphoma nung nüboyim sentong ka nung jembia liasü; iba yim ya Medziphema nungi kilometer 50 shi pilar (Tsiepama yim adena) lir, ta NDPP 5 Ghaspani-II A/C Press Secretary, Thejangukho Yalietsui sangdong ka nung metetdaktsü.
Iba yimdak panchayat hall nung lokti den jembidang Rio-i, “Sorkar tashi tait ka alitsü atema telongjemji kanga tongtibang, ibaji ajangadang tanü asenoki terenlok angutsü,” ta shia pai constituency nung aliba nüburtem dang tangatetba balala liaka ajak longjemer külem mangdang ka yur inyaktsü ayongzük.
Taoba sorkar tu khenyongi tamakok ka liasü, aser ibaji lenisüba, telongjem maliba aser ochimashi kulitem ajanga lir, ta pai metetdaktsü.
Iba dak sendakba nung pai, pa aser par party-i sorkar tashitait ka amenoktsü aser kodang takok ngudir NDPP chief minister candidate, Neiphiu Rio lenisüba nung lenla ajaklen terenlok mapa inyaktsü, ta metetdaktsü.
Paisa lokti dang, party indang tongtibangtiba onükji Naga yimtenren onük lir, ajisüaka iba onük tajungtiba nung shisa kaa latettsü atema nüburtemi amaliteptsüji kanga tongtibang, ta ashi.
Pai ashiba agi, tesüiba kümtem nung pai mangdang yua aliba ama constituency junga metenzüktet, aser ibaji taoba Chief Minister, Rio-i toktsür MP akumba sülen assembly nung melungmasü aliba kuli ajanga lir, ta metetdaktsü.
Ajisüaka ano maongka dang agutsüra pai jila aser yimtsüngtem naprongla nung terenlok atema inyaktsü, mapa adokdaktsütsü aser tetsür o tanurtem atema inyaktsü aser constituency den state naprongla nung infrastructure terenlok atema inyaktsü, ta nangzüka liasü.
Kasa sentong nungsa Keviyani Thepa, Wt. Hollen, Alal Doungel aser Khekiho Ayemi nungeria jembi.