Zidane-i club nung asayar tasen maginür

Madrid, Aenjeti 09 (Agencies): La Liga nung lenir, Barcelona dang points 16 agi tajemba nung liaka, winter transfer window mapang par club asoshi asayar tasen maginür, ta Real Madrid coach, Zinedine Zedane-i ashi.
Champions League last-16 nung Paris St. Germain den asayatsü aliba telok, Madrid ya iba league nung jenjang pezübuba nung lir aser par club indang asayadak tesem nunga junga masayateti arur.
Tentonü (Monday) Barcelona-i sen million 160 Euro ($190 million) agi Liverpool nungi asayar mongin, Philippe Coutinho alizüktsü renemogo, aser iba ajanga asayar alitepba otsü yanglushi, saka Zidane-i par telok nung tang aliba asayartem dang aginür.
“Ni nisung shinga maginür aser ibaji dang alitsü. Ni shinga maginür, ni kicha maginür,” ta Zidane-i Sangtennü osangbener senden ka nung jembiba mapang ashi.
“Onok telok ka lir aser iba telok dak temulung alemer. Season ka nung timtemba mapang ajurur, saka ajak onok jakdang lir aser tang atalokba aser season tatem nung kechi atalokdir reprangdangtsü,” ta France nungbai ashi.
Luchii (December) nung Santiago Bernabeu nung asayaba mapang Madrid ya Barcelona-i 3-0 agi akok aser Spain nung osangbenertemi tang Spanish aser European champion bena aliba telok ya teraksa tia nung lir, ta ashir.