Zimbabwe tir Mugabe yimjakmai adok

Harare, November 17 (Agencies): Linük mitkartemi Bodhbarnü menden atsüngdokba sülen Zimbabwe Tir Robert Mugabe tanü mezüngbuba yimjamai adokogo.
Pa ya linük yimtiba, Harare nung graduation sentong ka nung aden.
Mugabe ya anogo eshika par kidang pua yua liasü. Pa melentsü asoshi linük nung menden agi raktepba sülen mitkartemi iba mapa ya inyak.
Mitkartemi Mugabe den ken o jembiba mapang ka lir aser tekeraba nung telemtetba ka nüburtem dang metetdaktsütsü, ta mitkartemi ashi.
Iba ama tensa ka nung Mugabe ya menden nungi alutsüla, ta war veterans association nung lenir, Christopher Mutsvangwa-i ashir.
Honibarnü yimdong nung longkak aittsü aliba nung nüburtem ajungai shilem agitsüla, ta pai ashi.
“Onoki asen konang ya tanaben yanglushinür aser asüng iba anogo lir…mitkartemi tenzükba mapa ya asenoki tembangtettsü. Mugabe dangi meyiba maotsü. Pai doktsütsüla,” ta Mutsvangwa-i ashi.
Graduation nung Mugabe adenba ya yimya ka lir, saka iba sentong nung pa angutsü ya aikati meimla,” ta Zimbabwe nung osangbener kati ashi.
Mugabe ya red carped nung meilongi jajaa ao aser telok den külemi linük naklo ken aten aser Zimbabwe Open University indang graduation sentong ya lapoktsü. Iba university nung Mugabe ya chancellor lir.
Mugabe-i degree agütsür rongnung nisung ka tenüng agi Marry Chiwenga densema liasü aser la ya Bodhbarnü Mugabe apusang police ketdangser indang kinungtsü lir, ta osang ajanga ashi.
Iba sentong nung arishi küm 93 tain Mugabe indang kinungtsü Grace Mugabe-a meliasü aser Education Minister Jonathan Moyo-a meliasü. Moyo ya Grace Mugabe indang tembar ka lir aser par indang ki ya mitkartemi mita bushi.
Zimbabwe yimden nung iba temelenshi adokba ya Mugabe-i taoba hopta linük tatong tir Emmerson Mnangagwa mapa nungi anendaktsüba sülen mitkartemi pa atsüngdoka liasü.
Mnangagwa ya Mugabe melentsü lenir tetemsü südi, ta nüburtemi bilemba mapang mapa nungi anendaktsüba ajanga Grace Mugabe nem lenmang lapoktsür ka amai aküm.