Chiyongba ministry !

Asenok ajaki jet ta angatetsü atema yangi English nung dang ‘ministry’ ta agütsür. Aji asü nung dang chiyongba ajanga Tsüngrem tenzükba mapa nung shilem agiba ta asenoki melamelaa angatettsü. Asenoki aiben chiyongtsü ya tebok asüngtsü kija atema dang ta bilemer, ajisüaka chiyongtsü ya tebok asüngtsüba dang nungi tongtibangba lir. Chiyongtsü agi nisung peladaktsür, tembar ayimer aser tesendaktep yanglur. Iba jagi asenok sobaliba nunga chiyongi jateper, shijep agütsüteper, aon kentsüteper aser tanü asüngbo tangar dang ajizüka asenoka cake agütsüteper. Item ajakji chiyongba mesüra chiyongtsü ajanga asenoka tangar den putepa alitsü merangba sobaliba tajung ka lir. Iba amaji, Laishiba nunga Yisuia chiyongba ajanga temenen purtem den Tsüngrem temeim kuli asüba asenoki angur. Yisui temenen purtem ki tonga oagi parnok den külemi mener chiyongba tatalokba otsü ajanga asenoki tanü putu nunga chiyongba mesüra chiyongtsü ajanga Tsüngrem temeim osang tajung lemsateptsü lenmang ka sayur. Atangji, tanü asenok arogo nungertemi Tsüngrem temeim kuli asüba “mission” wadang nung kanga meranga inyaker. Aji oda, asenoki Yisu dak mamangba purtem dang Yisu temeim indang ashir aser parnok tanüla kümzüktsü meranger. Iba tangatetba nung asenoki school lapoktsür, shirangertem yarir aser parnok asoshi mapa tajung jenti inyaktsür. Item ama temeim mapatem jagi parnok aikati Yisu Khrista temeim meteta kümogo. Ajisüaka, ano asenoki Yisu Khrista osang tajung agi metongtetba tesem, kibong aser nübo aika lir. Itemji alinük talangka nung oa alirtem masü saka asenok anasa alir rogotem lir. Aiben asenoki talang nung oagi alirtem indang bilemdang, asenok anasa anogo shia asenok den alir samaba tanülatem indangji mebilemer. Ashiko, asenoki parnok dangjibo o tamajungang shia alitsü mesüra asenok libaliro ajanga parnokang asenok dak metsüdaka alitsüa akok. Itemji ken meyipa reprangdanger asenoki parnok den o kija agi masü saka temeim mapa aser chiyongtsü lemsatepa külemi chiyongba agi Yisu temeim kuli sütettsü ta bilemer. Iba tangatetba ka amangba purtem den lemsatepnüba agi, taoba hopta nung asenoki iba osang kaket nung, ” Asenok arogo nungetemi Christmas benjong chiyongba ya mamangba purtem jaoka külemi chiyong nunga koma süla ?” ta asüba nung tebilembatem lemsatepogo. Atangji, chiyongtsü ajanga Tsüngrem mapa inyaktsübaji mashi mapang ka nung inyaktet. Ajisüaka, asenok den aser asenok meketa aliba mamangba purtem den Christmas mapang ama nung külemi chiyongbajisa tetezü taketba asütsü. Iba mapangjibo asenoki Yisu Khrista alimai aruba nükjidong indang melamelaa shitettsü. Atangji, mamangba purtem den Christmas mapang külemi chiyongtsüba sentongji arogoi ayongzükbasa tajungba saka ano arogoisa mayongzükyonga kija- kibong mesüra medemer aser kiyonger telongjemia ayongzüktettsü. Tsüngrem temeim angatettsüba sentong aser maparen nung chiyongtsü ya tongtibang masü asübo Yisuia Pa sülen anidakertem nisung meririjang paika nem to chiyongtsü magütsüla ta bilemer. Yisu asoshi Pa sülen Pa o anga anidaker telokti nem chiyongtsü chiyongdaktsütsübaji kanga tongtibang teinyaktsü mapa ka liasü. Iba tesayubaji ajizüka tanü asenokia Pai tenyaba mapa inyaktsübaji kanga tongtibang kümogo. Asenoki mamangba pur kibong shiai orr Yisu temeim kuli mesütettsü. Asenoki asentenshi sentong tulu ayongzüker parnokji ajayonga marutsü. Ajisüaka, asenoki parnok den benjongbentsü mapang ka nung külemi chiyongtsü sentong yanglur, iba mapang ‘Yisui kümzüker” ta shitetra, asenoki Pa kulisüba mapa inyaker asütsü. Atangji, asenoki soruchiokba chiyongtsü asoshi parnoki nungnanga bilemtsüa akok, anungji soruchioka parnok nem dang parnoki chinüba ama soruchiokdakjang aser iba yari parnok nem sen dang agüjang. Ibajiang sen ishiba aotsü aser chiyongtsübo tajungba asütsü aser nisunga ajak medema arua pelateptsü.