December 12 nü ‘Vardah’ yipru agi Andhra Pradesh kongshitsü

Hyderabad, December 10 (Agencies): Bay of Bengal nung aliba yipru mopung ‘Vardah’ tang tesashiba kümogo aser tang Nellore nungi kilometer 880 pilar lir, ta Honibarnü Meteorological department osang ajanga metetdaktsü.
IMD-i ashiba agi, Hokolbar ayaterm nung Bay of Bengal nung aliba yipruji tesashiba kümogo.
Iba dak sentakba nung tanü Andhra Pradesh Chief Minister, N Chandrababu Naidu-i senden ka ayonga menogo.
December 11 aonung nungibo Andhra Pradesh aser north Tamil Nadu tzüyimkümtem nung mopung sashia aontsü aser tzüyim nung tzüsem tulu alitsü imlar.
Angopurtem dang tzüyimi angopui maotsü metetdaktsüogo.
Tesüiba ghonda 24 tsüngda iba mopungji ghonda ka nung kilometer 7 tekara nung westnorthwest tsütsüleni ondar aser tanep 8:30 ako nung Latitude 12.7ºN aser Longitude 88.0ºE anasa Bay of Bengal nung liasü.
Iba yipruji westnorthwest tsütsüleni aontsü akok aser taruba ghonda 24 tsüngda tesashiba akumtsü.
December 11, 2016 nikongdang tashi nung ibaji tesashiba akumba sülen Andhra Pradesh tzüyimkümleni aondang tanem-tanemi süngjemtsü akok.
December 12 nikongdang mesüra aonung iba yipru jagi Nellore aser Machilipatnam tsüngda Andhra Pradesh tzüyimküm süitsü.