Football asayatsüren toktsüba sülen Liverpool coach inyaktsü bilemer: Gerrard

London, January 04 (Agencies): Britain nung tentetba tongti football asayatsü telok, Liverpool asayar mongin, Steven Gerrard-i football asayatsüren toktsüba sülen Liverpool telok indang coach inyaktsü bilemba olen ka metetdaktsüogo.
“Ni tanü tashi tatem küma telemtetba agia mali saka ni football asayar ka ama taküm 2016 küm ya tatembangsüa shilem agitsü tebilemba lir,” ta taoba England captain, Gerrard-i metetdaktsü.
Arishi küm 35 tain Gerrard-i America nung ayonga asayba tongti football asayamong, Major League Soccer (MLS) nung shilem agitsü asoshi tang terenemshiba tagidak lir.
“Ni Germany nunger tongti football telok manager, Jurgen Klopp den sensaksemogo. Ni coach inyaktsü asoshi Liverpool teloki tanü tashi ni jaoka mali saka parnoki kü nübo aginüba osang taoba mapang metetdakja lir,” ta Gerrard-i ashi.
Gerrard-i yaküm meimapang Liverpool telok toktsü aser MLS asayamong nung Los Angeles Galaxy telok nung züngsema shilem agitsü tenzük.