GHSS Pfutsero nung organic kitchen gardening tenzükogo

GHSS Pfutsero nung March 12 nü kaketshirtem dang metsü proktsü sayuba noksa nung angur.

Dimapur, Metsüremi/March 12 (TYO): Kaketshirtem nem life skill education agütsütsü nükjidong nung Government Higher Secondary School Pfutsero-i class 6, 7 aser 8 nung azünger kaketshirtem nem vocational learning ama composite organic kitchen gardening inyakyim sayutsü atema tenzükogo.
School kima March 12 nü metsü prokba sentong ayongzüka amungba mapang Pfutsero GHSS principal Vechikhoyi Lohe-i, kaketshirtem dang mapa meranga inyakba yimya koda tongtibang aser taküm nung life skill tem takokba tshi angazüktsü asoshi ajungshi.
School composite kitchen garden atema school nung Grade IV staff temi tenüngdakba maparen ajak achaayanga inyak aser kaketshirtem dang metsü proktsüba yimyatem sayua liasü. Maneni school nung elementary kaketshirtem atema carpentry aser sü mechiba tanaben benoka sayutsü asoshi merangdangdar.
Kasa mapang nung RMSA teyari nung school nung vocational learning nung shilem ka ama music lesson tem agütsütsü asoshi benokogo.