ICAN nem Nobel Peace Prize 2017 agütsü

Oslo (Norway) October 06 (Agencies): Hokolbarnü Norway yimtiba, Oslo nung International Campaign to Abolish Nuclear Weapons (ICAN)-i Nobel Peace Prize nguogo; ICAN ya alima nung linük 100 nungi mulungtet teloktemi akümba tentet ka lir.
International ozüng kübok nuclear raraba oset nokdangba takok angutsü atema ICAN-i kanga tongtibang shilem ka agia arudar.
Iba dak sendakba nung Norwegian Nobel Committee-i, nuclear raraba oset amshiba ajanga alima nung lendong tulu ataloktsü nokdangba maparen nung ICAN-i shilem tajung agiba atema parnok nem iba sempet agütsür, ta metetdaktsü.
Iba award agütsüdang Nobel Committee-i, taruba nung teinyaktsü meraji- alima nung nuclear raraba oset malitsü atema nuclear aliba linüktema shilem agia dendaktsütsü atema inyaktsü, ta metetdaktsü.
Committee-isa, tesüiba küm ka tsüngda ICAN-i alima nung nuclear raraba oset malitsü atema nükjidong tasen ka yur kanga meranga inyakogo, ta metetdaktsü.
“Mapang talangka mamshii aliba sülen tang asenok, nuclear amshitsüsa aliba tensa ka nung asenok lidar. Linük kari parnok indang nuclear osettem jenti rizüngdar, aser ano lendong tulutibaji- North Korea-i inyakba ama linük aikati nuclear raraba oset bendentsü. Nuclear raraba oset ya meimchir aser alima nung aliba taküm shiruru ajak atema amokmeren ka lir. Nuclear raraba oset ajanga teraksatsüba tulu alitsü. ICAN-i inyakba mapa ajanga iba tetsüngda asüngtsü atema yariogo,” ta committee-i metetdaktsü.
Committee-isa, Alfred Nobel-i mulungba nung ajemdaker ICAN nem iba award agütsütsü kanga temsüa liasü, ta metetdaktsü.
Iba award den külemi taküm December 10, 2017 nü Oslo yimti nung ICAN nem senpet Sweden nunger sen million 9 (US sen million 1.10) agütsütsü.
2017 Peace Prize-i nuclear aliba linüktem dang, alima nung nuclear raraba oset 15,000 samatsü atema ken o jembitsü ayongzüker.