ISIS, al-Qaida-i tamangba yimsü tenüng amshir: Naqvi

Khambat (Gujarat), February 14 (Agencies) : Deobarnü Union minister, Mukhtar Abbas Naqvi-i, ISIS aser al-Qaida ama kiralongrar teloktemji tamangba yimsü kecha den-a tesentaktep mali, ajisüaka parnoki tamangba yimsü tenüng parnok amshinütsü amshir, ta aitsüogo.
Naqvi-i ashiba agi, kiralongraba ajanga tayongzükbatem atema sorkar shilem dang nungibo lokti shilem ji tongtibangtiba.
Minister of State for Parliamentary Affairs & Minority Affairs, Naqvi-i, “Kiralongraba aser ISIS den al-Qaeda ama kiralongrar teloktemji ali meimchir aser alima azükaru atema tsükchir lir ta asenoki angatettsüla. Kiralongrar teloktemji tamangba yimsü kecha den-a tesentaktep mali, ajisüaka parnoki tamangba yimsü tenüng parnok amshinütsü amshir,” ta ashi.
“Kiralongrar teloktem indang sentong tamajungtemji nüburtem, talisa lanurtem nem angatetdaktsütsü atema tamangba loktitem aser tamang lenirtemi shilem tajung agitsüla. Alima nung yimjung asoshi aser parnok sentong tamajung raksatsütsü atema asenok longjemer raratsü nüngdak,” ta paisa ashi.
Khumbhat nung 796buba Sarkar Shah-E-Miran Hazrat Peer Miran Saiyed Ali Vali sentong nung International Sufi Conference alidang Naqvi-i item o jembia liasü.
Kasa Conference nung, tamangba yimsü tenüng amer meimchirtem anema inyakba aitsütsü lemtet.
Naqvi-isa, alima yimjung aser azükaru atema tayongzükba tulutibaji kiralongraba aser tali bilemoka oa inyakba mapatem lir, ta ashi.
“Tamangba lokti tentettem aser lenirtem longjemer kiralongraba anema apusora kiralongraba sentongtemji takok mangutsü,” ta ashi.
Yimjung aser azükaru lenmang nung jajatsü atema asen sobaliba aser Linük Temzüng ajanga jangjajangja ashir, ta minister-isa ashi.
Ato kilonser Narendra Modi tenüngsanga Naqvi-i, “Modi ya alima nung yimjung aser azükaru osangbener tulu ka kümogo,” ta ashi.