KADTA-i lungkak aittsü amokmerener

Dimapur, May 23 (TYO) : May 20, 2016 aonung 8:00 ako nungi 9:00 ako tsüngda, Lahorijan nung tipper truck (10-wheeler) ka nung lisem bener anena lia, Augustine Kramsa aser par teloki prangpong agi driver aser handyman amokmerena gariji tashiyim agi bener ao, ta Karbi Anglong-Dimapur Transporter Association, President, Anil Toppo-i sangdong ka nung metetdaktsü.
Parnoki tata gari (NL 07 A 6571) bener aobaji tanü tashi mangur aser osang angazükba agi Weighbridge aser Karbi Anglong Truck Owners Welfare Association nem sen magütsüba agi gariji bener ao. Iba dak sendakba nung Karbi Anglong-Dimapur Transporters Association-i Diphu police dang gari bushitsü aser aibelenertem tekaratiba nung aputsü atema mepishia metetdaktsüogo, ta Anil Toppo-isa sangdong nung shia lir.
KADTA-isa Diphu SP aser Karbi Anglong district administration dang Weighbridge aser KATOWA nem ozüng alema sen sarutsü atema shibai temelaba agütsü ta metenüa asüngdanger. Iba telangzüba ya magütsüra, KADTA-i NH-36 aser 39 nung chakka jam alitsü, ta KADTA President-isa metetdaktsüogo.