Kohima Volleyball asayamong Nov. 17 nü tenzüktsü

Kohima, November 15 (TYO): Kohima kübok Indira Gandhi (IG) Stadium nung 4 buba Kohima District Volleyball asayamong tan November ita 17-18 nü asayatsü lemtetshiba osang ka Kohima District Volleyball Association (KDVA)-i tanü sangdong ka ajanga metetdaktsüogo.
Tsüngsang majungba ajanga tetsür aser tebur naprongla nem shilem agidaktsütsü asoshi ayongba asayamong ya thinena liasü.
Tan asayamong nung shilem agitsü telok manager aser coach-temi tan November ita 16 nikongdang 2:00 ako nung IG Stadium kübok Hockey ground tonga asayamong den sentakba osangtsüsang agitsü asoshi kasa sangdong ajanga metetdaktsüogo.
KDVA-i ‘Transcending through Sports’ omen nung ajemdaker ayongba asayamong lapokba sentong tan November ita 17 anepdang 9:00 ako nungi tenzüka agitsü aser iba sentong nung Kohima Deputy Comissioner, Rovilatuo Mor tongti tesemdanger alitsü.
Ano külen, tan November ita 16 anepdang 9:00 ako nungi tenzüka, Hockey ground merüktettsü indang shia, KDVA aser asayamong den sentaktepba luden ajunga nungi züngsemtemi iba sentong nung shilem agitsü tayongzükba olen ka KDVA-i par sangdong ajangasa metetdaktsüogo.