Myanmar election : Suu Kyi’er teloki takok angur

Yangon, November 9 (Agencies) : Myanmar nung sorkar yimsü asüba telok mendenbuba Htay Oo-i Aung San Suu Kyi’er opposition tsüngdang tamakok nguogo ta metetdaktsü.
Myanmar nung küm 25 sülen talenba kecha melii mezüngbuba national election agiba nung vote agütsüba agizüker, ta paisa ashi.
“Onoki tamakok nguogo” ta Union Solidarity and Development Party (USDP) lennir Htay Oo-i osangbener dang ashi.
Myanmar national election indang votes tezüngdak lir aser osang yimjak nung ano memetetdaktsü saka linük nung osangtsüsang agitepba ajanga Suu Kyi-i aniba National League for Democracy (NLD)-i menden timba nung takok angutsü amai angazüker.
“Onok tamakok anguba indang kuli bushitsüla. Ajisüaka onoki tanga tebilemba kecha melii results agizüker. Tang tashi nung final result memetet” ta Htay Oo-isa ashi. Pa ya Myanmar Tir Thein Sein den teyariteper tongti ka lir.
Oo-isa, Hinthada nung ozü parliamentary constituency nunga onok tamakok anguba atema süngmanger kechiyong iba tesem ya USDP pusemer alidak ta züngshir, ta metetdaktsü.
“Ni iba amai ataloktsü meimla, kechiyong onoki iba tesem nung alirtem asoshi mapa aika inyaktsüogo. Ajisüaka, iba ya nübortem telemtetba lir” ta paisa shisem.
Tanü anüngdang nungi Yangon nung aliba National League for Democracy (NLD) headquarters kima nung yokyayokjirtemi Suu Kyi indang tejak enoka yangluba T-Shirt nung “Asenoki kokogo” ta zülur ayoktsü tenzük.