NAC-i Open Supercross tetoktepba ayonger

Open Supercross tetoktepba nung shilem agitsüpur kati Kohima kübok Local Ground nung motorcycle tendanga anishiba noksa ka yangi angur. (Kohima, May 30)

Kohima, May 30 (TYO): Nagaland Adventure Club (NAC)-i ayonger külen Kohima Local Ground nung Open Supercross tetoktepba sentong taruba June ita 2-3 nü tashi agitsü renemogo.
June 2 anepdang 10:30 ako nungi tenzüka agitsü renemba tetoktepba lapokba sentong nung Nagaland Parliamentary Secretary, Youth Resources & Sports, Music Task Force & State Lotteries, Khriehu Leizietsu aser June 3 nikongdang 4:00 ako nungi tenzüka agiba sempet agütsütsü sentong nung Nagaland Youth Resources & Sports Director, Asangla Imti tongti tesemdanger alitsü.
Tan tetoktepba ya India ajunga nung motor sports ketdang asür, Federation of Motor Sports Clubs of India (FMSCI)-i ketdangsüa Nagaland nung tan mezüngsüa agitsü renemer lir.
“Tan tetoktepba nung Nagaland den külemi, Meghalaya, Mizoram, Bengaluru, Hyderabad aser Assam nungi motorcycle toktepa anishirtemi shilem agitsü,” ta NAC Tir, Paul Rutsa-i metetdaktsüogo.
Paisa ashiba agi, FMSCI ketdangsertemi FMSCI temzüng ozüng amshia, tan tetoktepba ya tendangtsü sentong renema lir.
Supercross tetoktepba ya atsübangba tesem ka nung renemba tetsükdaktsütem ajangdanga motorcycle anishirtemi toktepa shilem agiba tetoktepba ka lir.
Experts, Novice, Open aser Nagaland nungi toktepertem atema Special category densema, shilem 4 küma lemsar agitsü renemba tetoktepba nung shilem agirtemi 500cc tashi agütsütetba engine mesenlokba motorcycle anishia tokteptettsü.
Ano, Experts, Novice aser Special shilem nung toktepertemi India nung yangluba motorcycle dang anshitsü saka Open shilem nungbo India aser bendanglen yangluba motorcycle anshitsü melatsü asoshi renemba osang ka Paul-isa metetdaktsüogo.