NPF CEC-i Party Tir nem MLA 8 anioktsü atema tashi agütsüogo

Kohima, August 04 (TYO): Naga Peoples’ Front (NPF)-i Mongulbarnü MLA ti anenja aliba tanaben züngsem anioktsü telemtetba agiogo.
Tanü Party Central Office nung NPF Central Executive Council (CEC) senden alidang iba telemtetba agi aser iba mapang NPF President, Dr. Shürhozelie aser Chief Minister, TR Zeliang naprongla liasü.
NPF telok nungi anenja aliba MLA tiji – G. Kaito Aye, Noke Wangnao, Imkong L. Imchen, Kuzholuzo Nienu, Zhaleo Rio, Tovihoto Ayemi, Pohwang aser Phukayi nungertem lir aser parnoki TR Zeliang-i aniba DAN sorkar anema noktakba atema taküm January 5 nü parnok party nungi anenja liasü.
Tanü NPF CEC senden nung, CEC-i Party President nem MLA tem anentsüba meyipa agitsü atema mapa inyaktsü tashi agütsüogo.
“Disciplinary Action Committee inyakyim mamshii telok nungi anenja aliba NPF MLA ti dang ‘presidential pardon’ agütsütsü atema CEC-i Tir nem tashi agütsüogo,” ta NPF secy. general, K G Kenye-i ashi.
Tanü senden nungsa Election Commission of India-i June 22, 2015 nü NPF Party symbol atema telemtetba agiba pelashishia agizükogo.
CEC-isa India sorkar dang Nagaland nungi AFSPA aser DAA agientsü aser NSCN(K) o India sorkar tsüngda Cease Fire maneni alitsü atema temepishiba agütsü.
Ano, NPF CEC-i yashi New Delhi nung India sorkar aser NSCN (IM) tsüngda yimjung tenangzüktep agiba pelashishia agizükogo aser iba nung Naga nungertemi aginübatem enoksema alitsü imlar, ta parnokisa ashi.
Party President Dr Shurhozelie Liezietsu, Chief Minister T R Zeliang aser Nagaland Legislative Assembly Speaker Chotisuh Sazo nungertemi kanga dang shisa kaa May 25, 2015 nü Naga yimten ken o atema Nagaland Legislators Forum (NLF) tentetba den Assembly nung telok ajak senteper Parliamentarian Working Committee of NLF tentetba atema CEC-isa par asem nem tenüngsang agütsü.