Serena Rogers Cup 3 buba round-i iogo

Toronto, August 12 (Agencies): Tetsür World No. 1 Serena Williams-i Italy tsür Flavia Pennetta madak tanabuba round asaya koka tang tasayadak WTA Rogers Cup asayamong tetsür singles shilem indang 3 buba round asayatsü jenjang yashi Mongolbar nü nguogo.
America tsür, Serena-i yashi minute 90 nung points 2-6, 6-3, 6-0 ngua Pennetta madak takok angu.
Yashi takok anguba ya densema Serena-i tennis asayatsü tenzüker tanü tashi nung asaya 725 buba akoker lir.
2011 aser 2013 na nung takok marok agizükba densema Serena-i taküm agi 3 buba Rogers Cup takok marok atonga agizüktsü alizüng tulu yua lir.
Tan August ita 31 nü nungi tenzüka asayatsü ayongba 2015 US Open takok maroka agizüka Open yimya nung tennis asayatsü tenzükba sülen tanü tashi nung Grand Slam takok marok 22 tashi agizüka otsü yanglula, Steffi Graf meneptsü asoshi Serena-i alizüng ayuba osanga jangjaogo.