Siang ayong nung NTU keta aliba tebilemtsü CM Khandu-i lemsatep

Itanagar, December 4 (Agecncies): Arunachal Pradesh Chief Minister Pema Khandu-i Siang ayong nung Nephelometric Turbidity Unit (NTU) densema aliba dak sendakba nung tebilemtsü kaa bilemba lemsatepogo. Pai ashiba agi, iba tebilemtsü dak sendakba nung state sorkari Centre den tongtepratepdar, aji asünungdang Centre-i iba ken o China den angatetteptsü.
Siang yong ya southern Tibet nungi tenzüka ayimer aser parnoki iba ayong dang Yarlung Tsangpo, ta ajar koba Assam nung Brahmaputra ayong ta ajar.
Iba ken o dak sendakba nung Khandu Home Minister Rajnath Singh den ajuruteptsü akok.
Pasighat Advance Landing Ground nung yashi osangbenertem den jembidang Khand-i ashiba agi, Siang ayong ajungbena melenshiba aser tzü nung NTU aika keta aliba ngutetba, koba ajanga tzü nung aliba shirurutem aika den kiset shiruru aika südaktsür, iba ken o ya pai aniba sorkari asadangdar.
Pasighat nung Siang ayong tebilemtsü dak sendakba nung Disaster Management Parliamentary Secretary aser iba constituency nungi MLA Kaling Moyong, Lok Sabha MP Ninong Ering aser deputy commissioner Tamiyo Tatak nungeri chief minister nem osang tejangja agütsüogo.
Deputy commissioner-i Khandu dang Siang ayong nung NTU kanga sashia aliba metetdaktsüogo, aser ashiba agi iba amaidang mapang tatsüka ora ayong nung aliba shirurutem dak kanga mejungi kongshitsü.
East Siang Public Health Engineering (PHE) Department executive engineer, Bimal Welly-i report ka renemba nung Siang ayong nung iron aika lir, ta shisema lir.
November 27 nü tzü sample bendenba sülen osang agütsüba nung, tzü nung material balala yimsa aoba ajanga NTU tali kümdaktsür aser NTU jenjang 425 lir, saka permissible range ji 0-5 NTU lir.
Kasa osang nung tzü nung iron 10 PPM (particles/million) keta aliba metetdaktsüogo, koba permissible limit ji 0.1 nungi 2 PPM tashi dang asütsüla.
Kasa sample ya Itanagar nung State Water Testing Laboratory-i yoktsü.
Maneni iba sample ya ano asadangshitsü atema Nirjuli nung aliba North East Regional Institute of Science and Technology-i yoktsü.