Tangatetertemi tenlar

Jawaharlal Nehru University (JNU) nung tawa kaketshirtemi ayongzüka senden ka alidang nisung kari India anema yimyim ayimba ken  o nung Jawaharlal Nehru University Students’ Union (JNUSU) tir Kanhaiya Kumar tepuokdak ayu aser tangbo pa bail nung chioka lir. Kasa tatalokba maparen nung JNU bangdak purtemi bushisüngdangba luden ka shimtet aser iba luden jagi Kanhaiya Kumar-i senchi sen meyirijang ter agütsütsü latettsü. Iba osang angashia Mumbai nung yimdong aokertemi sen meyirijang terji bendentsü aser parnoki Kanhaiya Kumar dang achiba senchiji agütsütsü ta metetdaktsü. Ajisüaka, Kanhaiya Kumar-i pai aibelena mali, anungji senchiji magütsütsü ta metetdakja lir. Ashi, senchiji agütsütsü ka asünunga Mumbai nung yimdong aokertemi agütsüla. Kanhaiya Kumar ya kanga sensaker kibong nungi lir. Tetsü ya Anganwadi Worker aser tebu shirang yipten nung lir. Pa JNU nung Ph.D azüngba ya scholarship agidang azünger saka joko ita aika iba scholarship senjia mangur, anungji par medemertemi dang pa nüngdak agüja yarir. Iba nisung yagi India nung ajemrepa aliba sensakertem nüchiso asoshi nokdaker. Pai India nungertem  India nungi nüchiso angutsü nüngdaker masü saka India nung nüchiso angutsü indang jembir. India nunger sensakertem ayaba nungi nüchiso aser kin tilartem kin tulutemi mezüngmeshiba nungi nüchiso nüngdakba indang yimyim ayimer. Paisa India nung ochimashi mapatem nungi nüchiso nüngdakba indang yimyim ayimer. Item yimyimji ayima tanübo pa India tesem ajaklen senzür. Atangji, pa yamaji senzütsüsa pa ket nung sen maka saka pa o jembitsü jaokertemi pa amentsüba tayimtsü aser train ticket alitsür. Joko, yimten telok ajaki pa aginür saka pa nükjidongji yimten telok nung adentsübaji masü India nung India nungertem nüchiso akaba jenjang nung lidaktsüner. Ashiko, asüng pa yimten telok ka nungi tatar yimsüsür akümtsüa akok, kechiyong nübortemi pa kanga aginür. Tanü Kanhaiya Kumar ama nungi asenoka tangazüktsü lesson aika lir. Asen lima nung asen nübortem asoshi tamajung aser ochimashi mapatem anema University nung azünger kaketshirtem aser lanurtemi yimyim ayima nokdaktsü nübortemi imlar. Tanü takar aser tulur kübok ajemrepa aliba nübortem asoshi teimla ajak agi kaketshir aser lanurtem lir. Item lanurtemi jagi Kanhaiya Kumari ayimba ama nübortem sensak tia nung lidaktsüba aser nübortem ochimashi mapatem agi ashioktsüba mapatem anema ola adoktsüla. Yimsüsür, tulur aser tematiba nung jenjang alirtemi teküpbok tia nung alir sensaker, tilar aser ajemrepa aliba nübotem ola madokdaktsür. Sorkar nungi parnok tangutsü tim kecha mangur aser parnok chinurtem asoshia tarutsü jenjang meyanglutsütetter. Anungji, kari danga parnok asoshi ola madoktsüra parnokjibo taküm tepiyong dang masü saka putusa putu alar aser meshimetsür jenjang nung alitsü. Aji oda, item tepetzük tia nung alir sensaker aser tilartemia Mumbai nung yimdong aokertemi inyakba amaji pei yimten aser lokti nung temelenshi tajung ka adokdaktsütsü mechi nung tangatetba tenla agütsütsüla. Pei kija ajangzüktsü dang mebilemi kodang asenoki yimkong ajungtsü bilema tangatetba tenla agütsüdir, iba tenla jagi alima nung nübortem asoshi sayatenya mapa inyaktsü. Tanü India nung sensaker aser tilartem tepetzük tia nungi ajungkettsütsü asoshi pei taküm bendanga agüja inyakertem Kejriwal aser Kanhaiya Kumar nunger ama nem nübortemi tangatetba tenla agütsüba ajanga India lima nung repranga lia temelenshi tajung tulu arutsü. Aji oda, asenok rongnunga alima yanglutsü aser sensaker mekokmeinertem jenjang tajungba yanglutsütsü indang bilemdanga jembidang, teti gari tajungtiba nung mener, anak a memezü aser auyia meponglok senzürtemibo sensakertem tia tajungba küma meyanglutettsü ta angatettsüla. Kanhaiya Kumari ayimba ama asen lima nunga ochimashi mapatem nungi nüchiso nüngdaker. Iba tongpang nung lanurtemi metsübui nokdaktsüla aser nübortemi tangatetba tenla tenlatsüla.