Tanü nungi CBI-i Vyapam ochimashi ken o bushi tenzüker

New Delhi/Bhopal, July 12 (Agencies): Hombar nü züngsem 40-i akümba CBI telok ka Bhopal yimti atongtsü aser Madhya Pradesh Vyavsayik Pareeksha Mandal (Vyapam) ochimashi ken o aser iba dak sentakba nung nisung 40 dak tema asüba ken o bushisüngdang tenzüktsü, ta Deobar nü CBI ketdangser kati ashi.
CBI ketdangser kati, Supreme Court tetuyuba nung CBI team ji Hombar nü Bhopal tonga aotsü, ta metetdaktsü.
“Supreme Court tetuyuba nung ajemdaker Vyapam ken o dak sentakba ken otem bushisüngdangtsü asoshi CBI-i züngsem 40-i akümba team ka tentetogo. Hombar nü CBI team ji Bhopal atongtsü aser bushisüngdang maparen tenzüktsü,” ta ketdangserisa ashi.
Tamalen Vyapam ochimashi ken o bushiba telok, Special Task Force (STF)-i CBI nem iba ken o dak sentakba kaket jenti agütsütsü, ta osang ka ajanga ashi.
Iba ken o nung nisung 2,100 dak tema puogo aser tajemba agi nisung 491 jenshia senzüdagi. Iba ken o dak sentakba nungsa tesüiba anogo 10 nü kija nunga nisung 5 tashi mejangjaba kuli balala ajanga süogo.
Sen crore aika dak sentakba tatidang agiba aser mapa nung shimokba ochimashi ken o nung tai tonglokja alirtem rongnung tongti nisungtem, yimtenren lenirtem aser sorkar tongti ketdangsertem densema lir.