Telongsulen adenertem

Asenok Naga nungertem yabo teimbaka tangatetbalen masü saka tangar longsua alidak oa adenertem lir ta reprangtetter. Iba jagi arogo tsütsüa aikati telongsulen apia oa adener aser yamaji yimten nunga tangar longsua aliba telok nung oa aploker. Iba jagi timtem takoksaa kangabo majurur aser temoatsüa tulukabo magitetter. Talisa, yimten tsütsü asenoki reprangdangra, küm tertrok jakdang Nagaland nung alir ajak amato Congress telok nung dena liasü, kechiyong iba mapang center nung Congress-i yimsü süa liasü. Atangji, Naga nunger tenüng agitsü kaji, iba ama Congress aienba mapanga Naga nunger yimten lenir ka anatibo regional party medoktsüi tenzüka aru. Iba sülen tanü tensa reprangdangra, joko nisung aika BJP telok nung adenba angashir, kechiyong linük nung ibai BJP aienba mapang lir. Aika asoshi center nung yimsü asüba telok nung adenbaji telemtetba shitak agir amai asütsüa akok saka koba telok nung südir süaka tangari timtema amenteta akadak oa anisüngzükba jagibo jangratema shilem agia moutettsü. Yimten telok ya election nung tokteper government akümtsü asoshi tentetba dangbo masü saka pei lima aser nübortem tajungba jenjang nung yutsütsü asoshi temulung nung ronga bilemba agi, nükjidong tajung yur tentetba teloktem lir. Iba ama tangatetba aser nükjidong nung 1885 küm Indian National Congress tentetba otsü asenoki jembir. Atangji, tanü aliba Congress telok yabo 1885 küm tentetba Congress telok amajibo masütsüa akok, kechiyong 1964 küm Jawaharlal Nehru sür Indian National Congress nung mangatettep adoka Congress O ta, aser Congress I ta lemdangba otsü lir. Atangji, tangbo Congress o nung adenertemi aniba Congress telok masü saka Indira Gandhi-i aniba Congress (I) telokang Indian National Congress kümogo. India yimten nüjiso nguli nungi Congress teloki yimsü süa arur, tang mapang tatsüka Congress teloki tatar hoho nung Opposition asütsüa temsü menden mengutetter. Ibajibo tamakok dang nungi tuluba maksü lir. Ajisüaka, iba ama tatar hoho nung medemertem tsüngda tejaka metentettsüsa tamakok tia nung aliba mapanga, Congress lenirtem aikati timtem, takoksa aser maksü arema Congress puküma nokdakba angur. Ano külen, Congress nung adener yimsüsürtem dang nungi taoba BJP nung yimsüsürtemi tamakok aser maksü aremba asenoki BJP telok kümtetter aruba otsü nung angutsü. BJP telok ya Congress kanga sashia wangshia aliba mapang 1980 küm tentet. Iba sülen 1984 küm parliamentray election nung BJP teloki menden ana dang ngutet, anungji iba mapang tatar senden nung BJP züngsem ana aser Congress züngsem noklang pezü dak tali liasü. Tanü parliament nung Congress jenjang dang nungi noklangben agia tamajungba tia nung BJP nokdaka liasü. Ajisüaka, BJP lenir L.K.Advani, Atal Bihari Vajpayee, Murli Manohar Joshi  Nitin Gadkari aser Raj Nath  Singh nungertemi melentepa BJP telok anir arudang, parnoki BJP telok nükjidong nungi maitsüi timtem aser takoksa arema nokdakba agi, tanübo shingaia kecha ashi majung tatar senden nung BJP teloki ayimayima bener aoba angur. Iba telok nungji asenok dener, kechiyong parnokji tashi tait telongsu aser yimten tashi parnok ket nung lir. Aji oda, tanü ama tia nung Naga nungertem aika yimten telok ka toktsür kati aoba angudang, küm tertrok jakdanga tang amai India tatar senden nung Congress ya opposition asütsüa metemsüba jenjang nung lilasang, Naga nungertem Congress nung yamato longsua denla medenla ta bilemer. Tanü BJP telok nung adenba ya asüng BJP jenjang majung aküm nung BJP toktsütsü asü ? ta aiben temulung nung bilemer. Iba yimobilem ajanga shinübaji, senso kaji koba yimten telok nung dendir denaka, iba yimten telok lipok aser nükjidong agizüktet nungang adentsüla. Yimten telok nung adenba ya election nung akoktsü asoshi masü saka iba yimten nükjidongji junger ta angateta iba nükjidongji tongtsütsü asoshi adener. Iba tangatetba nung, koba yimten telok nung dendir denaka iba yimten telokji asen kibong aser taküm akümtsüla aser iba telok nükjidong nungi mepilai akok tashi pei adenba yimten telok tangatetba aser nükjidong ataloktsüsa tenzüktsüla.