Volcano ajanga Indonesia nungi tayimtsü mejajai anena adar

Indonesia, July 16 (Agencies): Nisüng aika Muslim tamanger benjung, Eid jakdang Archipelago tesem ajanga aotsü lia, Brihostibar nü Volcano adoka mitsü agi pongbangba ajanga Indonesia nung aliba yimti rongnung tanabuba tulutiba nung tayimtsü jajaba anenadok.

Asetkong Java nung aliba, Surabaya nung tayimtsü jajaba anenba ya Bali asetkong nung volcano adoka mitsü agi asüngba ajanga liasü koba ajanga sodi mapang senzü-senponger aika mesenzüteti aküm.

Raung tenem nung hopta junga volcano adokba ajanga nikongdang 1:30 ako nungi 8:30 ako tashi Surabaya anasa aliba Juanda tayimtsü anenba tesem shibangang ta ketdangsertemi metetdaktsüogo, ta tayimtzü anenba tesem nung otongdar Liza Anindya-i ashi.

“Shisa bulutsü tulutibaji, item mitsü yagi tayimtsü nung timtem agütsütsü tsübur,” ta lai ashi.

Tayimtsü mejajai anenba ya Indonesia nung sodi mapang ka lir. Iba mapang ya nisung aika ainlen jajar aser Eid benjung amungtsü asoshi kinünger kidangi aruba mapang ka lir.

Iba benjung ya Indonesia nungbo ita ka lumiba sülen iba ita tatembang, Hokolbar nü amungtsü sentong lir.

Ketdangsertemi iba tenokdangba ya Raung tenem nungi Surabaya anüolen mile 110 tashi nung agütsüogo.

Bali nung aliba tayimtsü anenba tesem ya sodi senzürtem asoshi tesem tiyong ka lir koba ajanga küm shisa tanga linük nungi nisung million aika Indonesia-i arur. Iba tesem ya taoba hopta nunga anaben tashi volcano adokba ajanga shibanga liasü. Iba mapang khen nung anogo ana tashi shibangbaji talangba liasü.

Indonesia nung volcano ajanga tayimtsü jajaba aiben anena adar kechiba süra iba linük nung active volcano 130 tashi lir.