1st Lt. Limatemjen M/Futsal tournament Mighty Ducks-i benogo

1st Lt. Limatemjen Memorial Futsal tournament champion telok Mighty Ducks den asayamung ayongertem, asaya ketdangsür aser Limatemjen’er kinungertem noksa nung angur.

Mokokchung, 18 Jan (TYO): Asür Limatemjen bilemteta 1st Limatemjen Memorial Futsal Open Tournament sentong ka Jan 16 nungi Jan 18 tashi yangi Multi-Purpose Sports Complex Mokokchung nung asayaa mungogo aser taküm iba asayamung marokji Mighty Ducks-i benogo.
Iba asayamung nung telok 12-i shilem agia liasü aser item rongnung tesüsabuba jenjang (final) tashi atongerji Mighty Ducks o Salunir F.C na liasü. Iba asaya nung Mighty Ducks-i goal 4-2 agi Salunir madak takok ngua parnoki champion aben. Iba asayamung ya Shooting Starz Club-i ayongzük.
Takoker mezüng jenjang angur nem tanga senpet den sen 30,000/- aser tadong (runner-up) nem sen 20,000/- agütsüogo. Iba den ano nija senpet/sempet; Man of the tournament-ji Raven F.C nungi Wangshitemjen-i agizük, Highest Scorer-ji Shooting Starz nungi Shiponglepba (14 goals) aser best goal keeper-ji Soccer Club Mopungchuket nungi Temsumongbai agizüka liasü.
Asür Limatemjen ya football asayar tajung ka liasü. Pa ya 2015 Jan 7 nung iba lima nungi pilaa ao aser pa ya Shooting Starz Club nung kibur liasü. Tang tashi nung Nagaland nung Futsal asayamung ayongba rongnung senpet sen teimtibaji agütsübaji iba asayamung nung asütsü, ta osang ajanga angazüker.
Asayamung shibangba aser senpet agütsüba sentong nung asür Limatemjen tetsü Lolenkoklai mapang tatsüka agia tepela o kar lemsatep aser organizing committee convener Sanglipong-i iba asayamung takok ngudaktsüba asoshi teyariteper ajak dang pelaba metetdaktsü.