2018 FIFA World Cup Preliminary-Round draw sentong agiogo

St Petersburg, July 26 (Agencies): FIFA-i par mangatettep ken o ajunga tezülen yutsür külen, 2018 World Cup finals den sentakba preliminary-round draw sentong yashi Honibar nü Russia kübok St. Petersburg yimti nung agiogo.
“Sentong renemba ama, 2018 World Cup asayamong tetsükdakba kecha majurui takok ngua asayatsü,” ta Russia Tir, Vladimir Putin aser FIFA Tir, Sepp Blatter nati yashi sentong nung metetdakja liasü.
“Russia-i World Cup takok ngua ayongtsü ta FIFA-i Russia dak tamang akar,” ta Blatter-i ashi aser “Alima ajunga süngmangdaktsütsüsa Russia-i 2018 World Cup ayongtsü,” ta Putin-ia metetdaktsü.
Yashi agiba sentongji alima linük 170 shi dang television ajanga sayuba osanga jangjaogo.
FIFA züngsem 209 pronglai World Cup nung shilem agitsü asoshi tenüng benoka liasü saka tanü tashi nung telok 22 tashi agienogo.
Tanüngba telok 187-i taruba ita 32 tashi nung asaya 851 tashi asayaba sülen tatemsüa shimtetba telok 31-i June, 2018 nungi tenzüka asayatsü ayongba World Cup asayamong nung Russia den külemi shilem agitsü.
Yashi draw sentong agiba sülen, Germany-i Czech Republic, Northern Ireland, Norway, Azerbaijan aser San Marino nunger den kasa telok nung atazükogo.
Taoba mapang nung World Cup takok marok agizüka alir, Spain aser Italy nata Netherlands aser France na den kasa telok nung densema lir.
England aser Scotland nata kasa telok nung densemogo aser Cameroon-i Somalia mesüra Niger den asaya 2 densemba knockout asayatsü lemzükogo.
2012 nungi tenzüka FIFA nung züngsemba South Sudan telokia Mauritania den 1 buba qualifier asaya asayatsü aser iba asaya nung takok anguba teloki Tunisia den 2 buba round nung ajuruteptsü.
World Cup nung shilem agitsü den sentakba qualifying tetoktepba ya November, 2017 nung tembangtsü sentong renema lir.