37 buba OKM lokti senden Jan 17-19 tashi amungtsü

Mokokchung, 13 Jan (TYO): 37 buba Ongpangkong Kaketshir Mungdang (OKM) lokti senden sentong tan January ita 17 nungi 19 anogo asemnü “takoktsütem alemdanga (Exeeding the possibilities)” omen nung ajemdaker Ungma yimtiba nung amungtsü ayongzüka lir.
Iba sentong nung tongti tayongerji IPR & Sericulture Parliamentary Secretary Wb. Imtikümzük alitsü, tongti tesemdangerji Secretary to Chief Minister and Secretary RD & SIRD (GoN) Wb. Kelei Zeliang (IAS) aser mungdang shibangba sentong nung Minister for Health & Family Welfare, Election & Parliamentary Affairs Wb. Imkong L Imchen jaoka lir.
Kasa sentong Jan 17 mezüng aonung “exeeding the possibilities: Relooking the political scenario in Nagaland” onük nung Wb. Jungshi S Jamir (Kohima)-i jembitsü, ano Jan 18 aonung “Exeeding the possibilities: Authentic individual towards social integrity” onük nung Urban & International Students’ Ministry (UESI) Secretary Wb. Imnazülu Jamir-i jembitsü aser Jan 19 aonung “Exeeding the possibilities: A socio-economic perspective” onük nung Eleutheros Christian Society (ECS) Secretary, Rev. Dr. Chingmak Kejong-i jembitsü jaoka lir.
Sentong nung ano OKM kübok unit balalai Mokokchung nung tzü tebilemtsü dak sentakba indang, Mokokchung nung foothill lenmang & lenmangtem sentaktepba, Mokokchung nung kaket riju nung tsükdakondak (constraints) aser nükla indang, tanü putu nung sobaliba melenshiba, saisapong luyim nung tsükdakondak aser nükla, clean election aser Mokokchung domestic market dak sentakba onük tapu balala indang topical presentation bener arutsü sentong renema lir.
Jangratemtsü kaji; January 18 nüji sobaliba arangshi ta sür sentong balaka Ungma Aonglenden nung agitsü aser iba nungji unit balalai sangpang atuba, meyu, yartsüngsang, tsüksen ken, süngkong ajenba, an tepong rara, mulushiba, meyong atokba, kongki awaba aser sobaliba saya tapu balala aitsü sentong tajung renema lir. Ano osang tajung kaji; inüji mezüngbuba Ongpangkong Kaketshir Mungdang “AO Oshi Tetoktepba” sentong a ka alitsü, ta osang ajanga angazüker.
Iba 37 buba OKM lokti senden sentong nung Ungma yimden aser Soyim Shisaluyimer Telungjem ajanga kaketshir meyi ka (1000) jaoka lir, ta angazüker.