37buba OKM senden tembangogo

Mokokchung, Aenjeti 19 (TYO): “Takoktsütem Alemdanga” omen dak rangloker 37buba Ongpangkong Kaketshir Mungdang (OKM) lokti senden January 17-19 anogo asemnü yangi Ungma yimti nung takok ngua mungogo.
37 buba OKM bangzüng renemba rongnung mezüngbubaji; tang koba ‘Ao Oshi Tetoktepba’ sentong agidar, ibaji maneni agiyonga aotsü lemtet. Tanabuba nung; 2018 küm nungi ‘Dr. S.C Jamir Meritorious Award Trust’ ta sür tenteta agutsütsü. Iba Trust kübok mezüngsüa Award-ji Ongpangkong tzükong kaketshirtem rongnungi HSLC (NBSE) nung jenjang tajungtiba nguteter nem agütsütsü lemteta liasü.
Tasembuba nung; 37 buba mungdang nung ‘Limketer’ nüngo kaket koba adokogo, iba kaket ji OKM mungdangti shia maneni adoktsü lemtet.
Pezübuba nung; tang aser tarutsü putu asoshi nükla tulu yur kaketnang mesükba ‘OKM Oral Tradition Archive’ ka lapoktsü nükjidong nung Ongpangkong tzükong yimtsüng shia tsürabur mapang nungi tebang o ajanga, taka ketsangtem, yimsüyimpong aser jilushi/saisapongtem rizünga ayutsü asoshi, tezüluba nung tejangja renema bendentsü. Iba maparen achayangtsü asoshi kaketnang zülur (Archivist)-i anir mapa küma inyaktsü lemteta liasü.
Pungububa nung; India lima merükteta ayutsü asoshi inyakba ‘Swaach Bharat’ sentong Ongpangkong lima ajak asoshi tatishitsü tajung ka küma tobur junga merüka litettsü asoshi Swaach Bharat sentonger den amalitep takang yur, yimtsüng shia iba asalendong mapa küma inyaka otettsü atema lenmang sayua ajungmesor ka ama OKM-i shilem agia 2018 küm nungi inyaktsü lemtet.
Trokbuba nung; Ongpangkong tzükong nung school ajak kümkümshidaktsüa, rangben shisaliok agütsür kaka kümdaktsütsü asoshi OKM-i yimtsüng unit-tem den teka amteper maneni nendaka reprangshia inyaktsü, lemtet.
Taruba OKM kümsük item mendenpur lenisüba kübok aotsü teloki mulunga shimteta liasü; Tir- Talitemsü (Settsü), Tatong tir- Akangmeren (Khensa), Tongti Zülur- Imsümeren (Longmisa) aser Repsem Zülur- Limasashi Longkumer (Longkhum).
Tanep sentong ka nung ‘exceeding the possibilities: a socio-economic perspective’ nung ajemdaker Eleutheros Christian Society (ECS), Secretary, Rev. Dr. Chingmak Kejong-i onük tajung aika bener arua mungdanger ayongzüka liasü.
Mungdang shibangba sentong nung Nagaland Health and Family Welfare, Election & Parliamentary Affairs minister, Imkong L Imchen tongti tesemdanger ka ama arua shilem agia liasü. 38 buba OKM lokti sendenji 2021 küm Küpza yimdak amungtsü.