Aadhaar maliba atema service ka danga menoktangtsüla: UIDAI

New Delhi, Tsüklai 10 (Agencies): Aadhaar maliba atema medical facility, hospitalisation, school admission mesüra PDS ajanga ration agütsüba maparen mesüra essential service ka danga menokdangtsü ta tanü Aadhaar ketdangsüa repranger UIDAI-i metetdaktsü.
Gurgaon nung Aadhaar card magütsüba atema tanur asotsü aliba tetsür ka mozü ki ka nung maniok aser iba tatalokba sülen anogo ka lir UIDAI-i iba osang sangoktsüogo.
Unique Identification Authority of India (UIDAI)-i tanü sangdong ka nung sorkar department tem aser state administration dang “Aadhaar atema medical teyari, hospitalisation, school admission mesüra PDS ajanga ration sota mayutsüla” ta tetuyuba agütsü.
Aadhaar ya technology amshia public service maparen nung tashishi melii inyaktsü nükjidong nung tenzükba lir saka iba ya tim mesüi mamshitsüla aser service magütsütsü atema tatemtsü ka ama mebenshitsüla, ta UIDAI-isa ashi.
Luchii 19, 2017 nü Cabinet Secretariat-i Aadhaar Act, 2016 nung tanga onüktem benoka lir aser iba ajanga beneficiary tem tangutsü tim angutsü atema tenokdangba kecha malitsüla ta metetdakja liasü.
Aadhaar card maliba ajanga mozü ki nung anepaluba masüba tatalokbatem ajanga UIDAI department nem tebilemtsü bentsür aruogo aser parnoki item ken o atema bushisüngdang asütsü aser ketdangsertemi aibelenba putetra ozüng tesashi agi merenshitsü ta metetdaktsüogo.
Senso kar danga Aadhaar card maliba atema tangutsü tim magütsüra, ketdangsertem tsüngdang ken o benokang kechiyong iba inyakyimji ozüng kübok merenshitsü akok, ta UIDAI-isa ashi.
“State aser Union Territory tem nung Chief Secretary ajak dang Aadhaar Act, 2016 nung Arrla 7 mapa küma inyakang ta maneni shidi ka zülutsü” ta UIDAI-isa shisem.
Rogonü Gurgaon nung aliba Civil Hospital nung tetsür ka tanur asotsü atema ao saka la ket nung Aadhaar card maliba ajanga lai mozü ki kishi anasa tanur asotsüsa tensa ka ajuru.
Iba tatalokba atema mozü ki ketdangsertemi doctor ka aser nurse ka mapa nungi anentsüogo aser bushisüngdang ka asütsü tetuyuba agütsü.
“Iba mapang onok ket nung Aadhaar card number dang liasü aser iba jagi onoki card bener asutsü ta ashi. Onoki la mozü ki nung anioktsü mepishi saka ketdangsertemi ibaji magizük aser Aadhaar card meshi” ta tetsürla kinungbo Babloo-i osangbener dang ashi.
Uttar Pradesh kübok Jaunpur nunga kasa tatalokba ka indang osang angashiogo. Iba mapang-a tetsür kati Aadhaar card magütsütetba ajanga mozü ki indang atem nung dang tanur aso.