ACAUT pu semertem

Taoba hopta nung ACAUT teloki ayongzükba senden nung nisung meyirijang aika adenshibaji ACAUT teloki Nagaland nung ochimashi mapatem anema nokdakba maparen nung pusemertem asütsü. Iba senden nung yimten tsütsüa teinyaktsü telemtetba karbo agiogo, ajisüaka ACAUT ya ochimashi mapatem anema nokdakba telok ka asünungji, parnoki renemba rongnung tongtibangtiba pangzüngji Nagaland nung September 2017 ita tashi nungbosa Lokayukta shimtsü atema ozüng küma latettsü asoshi takhangba agütsübaji asütsü. Lokayukta mesüra Lokpal ta asüba ya state shia nung government inyakyim nung ochimashi mapatem nokdangtsü asoshi nisung kar shima bushisüngdangdaktsüba mapatem lir. Kodang iba ozüng lateta mapa küma benshia aotsü tenzükdir, idangjibo yimsüsürtem aser ketdangsertem ajak pei akaba rongsen ajak government tsüngdang metetdaktsütsü . Iba nükjdongji, yimten nung yimsüsür aser ketdangsertemi ochimashiba lenmang nungi senotsü mebendentsü asoshi tenokdangba ka yokba lir. ACAUT senden nung sannüker kati ashi ama, tanü telung aser tema nung yimsüsürtem manger sangwa nung takar akümbaji pei sen agi akar masü saka nübortem meyong sen agi akar. Ajisüaka, Nagaland nung tanübo kecha makaba nisung kati küm anasemka tsüngda RCC ki anüng tonga tua amentepa asüyonga shingaia ibaji kechi sen agi asür ta yimten tenüng nung asüngdangyatsü makoker. Ibayongji, kecha marendaki yimsüsür aser tulurtem aikati nübortem meyong senotsü auyar. Atangji, state nung ochimashi mapatem nokdangtsü aser bushisüngdangtsü asoshi Vigilance Commission lir saka Vigilance Commission-ji state government temelaba magii ochimashi mapa anema inyaktsü memelar. Iba kasaji center nunga CBI lir saka parnokjia state government temelaba magii state government nung ochimashi mapa inyakba bushitsü makok. Iba ama yimten tia ka nung, government nung alir pei lima aser nübortem memeimer asoshibo sademsadema auyatsü mapang tajung lir, iba jagi mauyar-ang takoksa ta ayimtena auyateper amai inyaker. Ibaji nokdangtsüla aser soittsüla, iba jagi Lokayukta mesüra Lokpal alitsü nüngdaker. Tang tashi nung, India nung state 20 dak tali nung Lokayukta ozüng ya latetogo aser item rongnung Northeast nunga 2014 küm Arunachal Pradesh aser Mizoram nungbo iba ozüng ya mapa küma inyakdagi. Atangji, Nagaland nung iba ozüng ya latettsü asoshi 2015 küm tatar senden nung benoka inyakdagi saka iba mapa ya inyaktsü asoshi nungloktsüba Select Committee-i tang tashi parnok mapa merenemtetter. Ashiko, parnoki akok tashi iba ozüng ya melatetdaktsütsü atema menudaktsür asütsü. Iba tia nung Vigilance Commission marakzüdaktsür aser CBI marudaktsür ta nokdanga yur, kar chirmechima bendener aser kar tanurtem school fee-a magütsütetter, mozü süngjang kata malitetter aser chiyongtsüa maka shisabolur ta Naga nunger Nagaland nung telok tapu ana kümogo. Joko, Naga nunger yimten tashi aketertema sademsadema pei auyanütsü auyatsüsabo sentong matongtsüla. Alima nung ya shiba südir süang aser kechi mapa nung südir süang, peisasa pei azüoka alitsü kanga nüngdaker. Anungji, yimten yimsüsürtemia aji meteta pei lima aser nübortem meima ochimashiba mapatem nokdangtsü aser bushisüngdanga inyaktsü asoshi Lokayukta ozüng amaji lateta yutsütsüla. Yimten menden nung ozüng yangludak tanü kar amentsü aser asüng kar amentsü, anungji pie mapang, pei dak nungi tenzüker ochishia alitsü asoshi temzüng ozüng lateta toktsütsübaji teti atema yimten tajung ka latettsür asütsü. Taoba mapang, India tatar senden nung RTI ozüng latetba yaa peisasa pei inyakba mapa nung kümdanga inyaktsü asoshi yimsüsürtemi latetba ozüng lir , kechiyong iba ozüng ajanga meyiper yimsüsürtem dang nungi senso mashi kati temetetnüba asüngdangtsü akoker. Iba jagi ochimashi mapatem aika putetter aser tenokdanga nokdanger. Iba kasa tangatetba nung ACAUT teloki akangba kija agi masü saka rongdak nüngdak reprangteta state government-i taküm 2017 küm matemdangsa Lokayukta ozüng yabo latettsüla.