Alima asoshi lendong

Tang tashi nung alima ajunga akoksatsüsa alima kintem o kintem na tsüngda tongpang tulu anaben raraogo. Tangbo item rara nung atalokba takoksa, tekangshi aser timtem ajak amadoker alima kintem yimjung nung renloka aotsü merangtepba mapang ka lir. Ajisuaka, ano tang alima asoshi nüken belemtsüsa atalokba kaji North Korea-i alima auyi küma samatsütsüsa nuclear bomb kanga tesashi yangluteta yur tendangpet tendanga amongba ya asütsü. Tang tesüsabo tan ita September 4 nü tendangba nuclear bombji  tetsübutsü lendong aketba hydrogen bomb lir aser ibaji zünga North Koreai tang mapang tatsüka tsüngda nung alima raksatsüsa bomb yanglur tendangbaji trokbuba asütsü. Tetezü joko, North Korea lenir Kim Jong-un-i samara par lima den külemi US, Japan aser South Korea dena alima ajunga samatsü aser mesamai lira alima ajak külemi alitsü ta bilemdar südi ta alimai angatetter. Ibaji alima ajak asoshi tetsübutsü aser nükenbelemtsü mapa tuluka lir. Iba ama nuclear bomb tesashi alima ajak raksatsüsa shinga kinia meyanglutsü ta alima kinten telongjem United Nations telatetba lir. Idakji ajemdaker, talisa, US tir Donald Trump-ia North Korea dang parnoki tashi mangai par lima nung nuclear bomb tesashi yanglur tendangra US-i kanga sashia inyaktsü ta amokmerenba osang ka agüja lir. Ajisüaka, US tir mezüngmeshir amato pai aji shi meshika ano Kim Jong un-i nuclear bomb tesashi ka tendangba agi, US-i alima kintem dang North Korea den shishilemba masütsü aser tesendaktep mayutsüla ta sangdongogo. Aji oda, koba kini North Korea den tesendaktep yudir par kin denji US tesendaktep malitsü ta Trump-i metetdakja lir. Tang North Korea lima nung nübortem kanga sensak tia nung lir saka par lenir Kim Jong un-i par lima rongsenren nung renloka nübortem jenjang tajungba yanglutsütsü bilemer masü saka par nüburtem dang tanga limatem renlokba mesayui parnokang alima nung tashi taitba kin amai sayua raraba nok-nü-temang tesashiba aser teimba yanglua par nübortemji teti tetsübu aser tarendak nung pa yimsüsüba kübok marakzüi lidaktsüner südi. North Korea nungbo tang tashi nübortem nem tangalen nungi yokba television mereprangdaktsür. Atangji, par nübortemi amangtsüsa kaji North Korea meküta South Korea aser Japan tashi aruagi US nungertemi parnok tang makdoktsü amai tesem mesemteta lir. Ano, kuli kaji, North Korea nungbo democracy mali, anungji yimsüsürtemji nübortemi shimmer masü saka kibong ka senmang lir. Iba jagi tang aliba lenir Kim Jong un tebou aser tebu na pronglai North Korea yamoka yimsüsüa arur külen, tang pa agi tasembuba par kibongisa yimsü asür. Atangji, tang North Korea den tesendaktep tera junga alibaji China lir, ajisüaka Chinai ashibajia North Korea-i angatsü asü mangatsüar memetet. Iba ama tensa tia ka nung, tanü putu tasenba nungbo akhidang ama alima raraka tenzüktsübaji kanga tetsübutsü mapa lir. Ashiko, North Korea ket nung akaba bomb ka jagi America lima ajunga ken nung auyi kümtsütsüa akok. Ano, ashiko iba dang nungi tesashiba bomb America ket nung akatsüa akok. Ano, tanübo bomb tesashi apoktsüsa yokba dang nungibo ano mopong nung miim tango chiokba bomb-sa lendong taketba asütsü. Aji oda, akhi alima rara ama, tanübo alima kintem telok ana kümer rara nungbo alima makatsü. Iba rara nungjibo takoker mali ajak takoksa angutsü. Iba lendongji ajaki meteta alinungji, alima nung rara kecha melii kin ajak yimjung nung alitsüsa North Korea den jembitsüsa lenmang bushiteptsüla. Iba yimjung lenmang bushitsü atema China tajungba asütsüa akok. Aji oda, China-i anir US, South Korea aser North Korea lenirtem ajurutepa alima yimjung indang jembitsübaji kanga rongdak nüngdak kümogo.