Alima nung linük tila rongnung jenjang pezübuba samadagi

Funafuti, July 08 (Agencies): Alima nung linük tila rongnung jenjang 4 buba nung aliba linük, Tuvala Ato kilonseri Europe nung lenirtem dang, iba linük alima nungi mesamatsü asoshi yaridaktsüner, ta mepishiogo.
December ita Paris (France) nung UN Climate change senden alitsü jakdang jelia Tuvala Ato kilonser, Enele Spoaga-i European Union lenirtem ajurutsü asoshi Brussels tonga ogo.
Asetkong ishika indang linük nung nisung 10,000 shi dang lir aser alima tzü-mepong melenshiba ajanga tzü atsünga atua iba linük samatsüsa lir.
Pai Europe lenirtem dang, global warming ya 1.5C tashi ajema alutsü asoshi greenhouse gas emissions ajemtsüla ta shiogo, kechiyong kümzüka alitsü asoshi level ji tang aliba 2C nungi 1.5C tashi alutsüla ta scientist temi shiogo, ta ashiba Brussels Times ajanga metetdaktsü.
“Iba asetkong ya tzü telung nung samara, ibaji ajanga climate change manentsütettsü. Onok asoshi tarutsü tiaji kechi lir ta ni asüngdangner. Ali meimchir kümzüktsü asoshi asenok ka küma longjemer inyaktsüla,” ta pai ashi.
“2 degrees global warming ji kanga lendong ta onok dang shiogo, kechiyong iba tetezü, Tuvalu ya tzü telung nung samatsü. Au, atangji onoki Tuvalu nüburtemji tangar limai anir otettsü saka ibaji ajanga climate change manentsütettsü,” ta Ato kilonserisa ashi.