Anarongdena aoba State

Dimapur nung nübortem anogo shia mazüngi jajaba apu ka chirep aser ka tesenzü majung aküm saka government-i ibaji jungjunga meyangludang mapang tatsüka senzüa alitsü asoshia apu tasen ka meyanglutetter, anungji tangarjibo yutsür shiranger aser school tanurtem mapang talangka timtem aser takoksa tulur ajurudagi. Ano, November 12 nü Dimapur nungsa transformer 20 MVA ka mi adoka arong. Ibaji memelenteti alidang ano ka mejungi aküm, anungji tang Dimapur ajunga asoshi transformer ka ajanga kiyong lemsar mapang balala nung mapang tatsütsü light agütsür. Nagaland government-bo lir aser state nung Road & Bridges aser Power Department na prongla lir, saka lenmang majung, apu maka aser light marur. Koma asütsü ? Lenmang majungba ajanga ghonda ka nung atongtsüba lenmang nung ghonda ana jajar. Iba ama lenmang nung jajadang shiranger temang tamajungba kümdaktsür, totsü tali atsüker aser gari raksar. Apu maliba ajanga minute ter nung atongtsüba lenmang agi anogo piyong jajatsüsa akümer, idangji mapang aser sen endoker saka nüngdakbo mapang shitak nung meinyaktetter. Joko, light ita junga marur, anungji industry tilala lapoka alir ajak generator agi mapa inyaker. Joko, ki aika nung fridge aser television nüngdak mali kümogo. Tilatiba agi photostat dokan lapoka alirtema mapa meinyakteti kümogo aser ku mejepdak dena light amshia inyakba mechimenu mapatem ajak anena lir. Aji oda, tang apu maliba aser light maruba ajanga takoksa anguba tia ya jungjunga asenoki bilemdangra shisabolutsüka lir. Tanü senotsü nung takoksa angubajibo yutsür Transformer 20 MVA ka raksa nung memelentettsüsa aliba tia ya asenok asoshi tetsüremtsüka lir. Iba ama lima ka nung tangalen ama menoknok tulu anoka alima raksatsü nungbo nübortem kong jenoktsü aser shibai anepalutsü ta shisabolua bilemer. Kasaji, apu tilaka chirep nung ibaji paidoka khen atema apu tilaka metemtetba aser lenmang meyanglutetba government kübokji nübortem alitsübaji shisabolu tulu lir. Asen lima nung ya tangalen atalokba ama alima lendong tulu atalok nungbo apu meyanglutet, lenmang melapoktsütet, light aser tzü magütsütet aser mozü kidang zübo dena mamtsütet, repranga lia nisung aika süadoktsü. Tang timatemba amai alima lendongibo tulur tilar aser takar sensaker mapir aser merepranger, anungji timtem nungbo ajak külemi timatemtsü aser takoksa nunga külem akoksatsü. Shitak jembidi süra, alima lendong ya takar aser tulurtemi teimba ajurutsü. Tanga apu majungba agi PWD R&B nung inyakertembo timtem majurur ta masü. Yamaji Power department nung inyakertembo light maruba agu timmatemer ta masü, ajak kasasa timatemer. Ibaji meteta asenok kechi mapa nung inyakdir inyakaka pei meyong küma kibur amai anepalutsü kanga nüngdaker. Aji oda, lenmang aser apu yanglutsü purtemi senjang kata mashileni moudaktsüi lenmang aser apu shitak yanglu asübo apu mechirepla aser chirepyonga jet ta yanglur lila. Iba amaji Power department nung alirtemi power house ajak jungjunga anepalua repranga mapang shitak nung transformer shitak melena yinzü aser yindong tashi shitak akangakanga alitsüsa anepalutet asübo transfomer merongla mesüra arongyonga jet ta melentetla. Lenmang tatsüka jungjunga meyanglutetba state, apu kata shitak meyutetba state, transfomer tejen aser tilala agi nübortem mesüshiba lima, yindong aser yinzü dena memelentetba lima. Iba amai lialia school nung jara meyanglushitsütetter aser mozü kidang yipten kata shitak meyutet kümdagi. Iba amaji asen tarutsü Nagaland-bo mesüdaktsüner. Transformer tilaka memelentettsüsa aser apu ka chirep nung meyanglutettsüsa state malitsüla.  Iba amaisa anarongdena state ka bener ao nungbo, tang asenok timatemba aser takoksajibo yutsür, chief minister kidang dena chiyong athitsüsa akümtsü. Iba amai pei lima nung pei lima agi akseta alitsüsa teimla nung Nagaland maküm. Nagaland ya rongsen  nangdena aliba lima, anungji item rongsentem jagi asenok perir anüngtsüsa asenoki litettsüla.