Anentsüh lendong nung nisung 6 asü

Gangtok/Siliguri, September 20 (Agencies): Sikkim South district nung tzünglu kanga sashia aruba sülen Bodhbarnü tesem aika nung anentsüh alua lenmang aika nokdangogo. Iba lendong nung tang tashi nung parnok trok süogo aser asem kanga mejungi yirur lir, ta police sangdong ka ajanga metetdaktsü.
Nisung tasüba ajak ya Namchi police station kübok tesem asem tashi nung anentsüh aluya ki chirepba sülen ataloka liasü, ta Additional Director General of Police Sudhakar Rao-i ashi.
Upper Gurpisey tesem nungi anepdang 2:00 ako nung anentsüh alua anenbangba sülen tanur ka aser lanura ka dena parnok asem süogo.
Tanabuba tatalokba ya Upper Bokrong ward nung anepdang 3:00 ako shi nung atalok, kong ki ka chirepa nisung ana tashi tepseta liasü aser Khorolong tesem nunga anentsüh ajanga ki ka chirepa lanur ka tepsetogo.
Maneni Lower Kateng Bokrong tesem nung ki chirepba sülen nisung ka yirua liasü. Pa anentsüh alua aliba tesem nungi aniteta Namthang mozüki nung dang temang anepalu tesüdak lir. Anentsüh ajanga South district aser West district len lenmang aika raksatsüogo. Lenmang yanglushiba maparen tenzükogo.