Antipong

–  A.Maong Aier Retd G/T, Alongmen ward, Mokokchung.

Oh! Antipong na ya meimchir atema Tsüngremi
Moatsüba shiruru tebur tajung ozü ka,
Ne soru ya tsüngkanger molushir mesük,
Na senzüdang nokinketer senzür amai,
Eyongji tsüngkangtemi ne jilu yia molushir
Oh! Na ya aküm taket teintet shiruru.

Oh! Antipong na soru ajungba ngua metepsetner,
Saka koda masü nung akhi mangpanga
Limapurtemi parnok amangba tsüngrem
Ajak külema meshiteta walok,
Tanü putu nunga na ang sempet ama amshir,
NPF Government-ia ne noksa ang amshir.

Oh! Antipong tzümartemia na mejitepa
Benjung tulu ayongzüka mongteper,
Ne tsüng nung kotari alenoktsür aser na
Tangar ka den mapateba mejitepdaktsür,
Makokba ka rangseta, takoker ne den sen angur,
Oh! Antipong na ya tongtipang shiruru ka ako.

Oh! Antipong na pongto mapang junga mokungtetdi,
Ko-ko ta akongdang, ne kiburi teti peladakja,
Asangur kümdagi, meranga kongang ta menüloktsür,
Saka kodang na intetdir, kokorok rok ta tanganütsüka
Kongtetba angashia ner kiyongertema longsodaktsür,
Iba jagi tsüngküm mongpo ajak azüdaktsüra nih.

Oh! Antipong, na kanga tara, tasü tait ozü,
Na tangar den mejitepdang, ne tashi ajak sayua
Anibelem arema mejitepa ngua nüburtem
Rara tongpang nung nokdak dang, ne dak ajizüka
Tongpang ajak jeta aiba ya na nungi angazük ako.

Oh! Antipong, na ajanga tajangzük aika angura nih,
Oh! Antipong nüburtemi na kodanga mesendoker,
Anepdang nai akongba ajanga, sangwatagi ta metetdaktsür,
Ano kodang tera mangsema akümba mapang nai kongdir,
Idangji lendong kar ataloktsü ta ratatepba nüburtem
Ajak dakzüdakponga renemshia atatepa atar,
Na ya meimchir ajak asoshi nükrangdong ozü ako.

Oh! Antipong, nai An tetsüdi dak kodanga memejir,
An chanutem moapu nung soyima chiyimdang, nai teti
Pei chanu ama meima, korok, korok ta külemi chimer,
Ne mapa ya ngua kibong nung tebudi kati teti
Kinüngtsü aser tanurtem ajak meima anepalur,

Nübener kibong ka yangertsü na nungi angazüker, Oh! Antipong.