Ao

Asenok Aoertem rongnung, talisa, lanurtem aika pei tetsü oshia mashi aser tangar bendanger oshia junga mejembitetter ta tetsüngda nung timtemba mapang ka Tir Yimyim osang kaket ya 2003 küm October 8 nü adok tenzük. Ibai Ao oshi nung anogo shi adokba osangkaket mezüngbuba lir.

Aji oda, Ao oshi jembitetter aser züngtetter nem Tir Yimyim ajanga pei lima aser bendang limatem nung atalokba osangtsüsang tekaratiba nung metetdaktsütsü aser alima nung nübortem asoshi nüngdakba onüktem tapu meyina bener arua shisa lemsateptsü asoshi sabang tajung agütsütsübaji oba osang kaket nükjidong lir.

Tanabuba nung, Aoerbo Aoer saka Ao oshi mejembiteter aser mezüngtettertema ajungshitsü aser pei tetsü oshi jembibaji senso ka asoshi nümadangtsü mapa ka kümdakja Ao oshi sapua jembidaktsütsü aser renlokdaktsütsü nükjidong nung Tir Yimyim adoker.

Akok tashi Tir Yimyim osangkaket nung lokti ka atsünga mesüra tejak repranga masü saka kechi shitak aser kechi tim, ibaji ochishia sangdongtsü meranger.

Aji oda, nübortem akoksatsüsa miimshia inyakba aser shitak mesüi inyakba mapatem jungkai adoktsütsü aser nübortem ajangzüktsüsa aliba lenmangtem bushia teyutsübaji Tir Yimyim tangatetba aser teinyaktsü asütsü.

Ao kin asoshi dang masü saka talisa Nagaland anüdoklen alir Naga kintem nem Tsüngrem temeim angatettdaktsüba aser kaketshisatsü angazükdaktsüba oshiji Ao oshi lir. Iba oshi ya Tsüngrem temeim aser alima shisatsü abenba oshi, anungji iba oshi ya mesamadaktsüi tajungba meyushia aser teimba kümdakja renlokdaktsütsübaji Tir Yimyim tangatetba lir.

Iba osangkaket nükjidongtemji atalokdakja inyaka otettsüsa Tir Yimyim tenzükba anogo nungi Tsüngremi inyakertem, teyaritepertem aser tazüngertem aika moatsüdagi. Iba tashi aser temoatsü nung tangbo Tir Yimyim ya Nagaland nung Naga nunger oshi nung adokba osangkaketem rongnung tematiba jenjang nung lir aser  English osangkakettem dena  Nagaland nung adokba osangkakettem rongnung tanabuba tematiba jenjang nung lir.
Aji oda, Naga lima nung dang masü saka alima tesem balala nung alir Aotsür Aoertemi pei lima nung anogo shia atalokba osangtsüsang aser nübortemi sapua jembiba onüktem metettsü aser lemsateptsü asoshi website nung agütsür. Nagaland nung Naga nunger oshi nung adokba osangkaket website nung züngtettsüsa enoktsübaji Tir Yimyim mezüng lir.

Iba osangkaket adok langa kija-kibong, lokti, arogo aser yimten nem tajangzük agütsütettsüsa ano maneni tazüngertem ajaki nungnanga mesüra laaka melii ajungshitsü, metongshitsütsü aser yariteptsü mepishir.

Tir Yimyim nung inyaker ajak tenüng nung :

K. Temjen Jamir
Yimozülur.