Ao oshi nübu junga arangtetdaktsüdi

– Sentirenba, Kohima.

Rev. Dr. E.W. Clark ajanga Ao Naga Dictionary kangasa apensa aser ulua adoka toktsüra süngla küm noklangka dak tali süir, shidi sürbo asen Ao oshi ya Naga lima aser North East nung tematiba oshi ka asütsüba sürnung Asen Aor o Aor na toktepa amungdang küm aika Ao oshi rajang liasü, tang Ao Senden akhüm nung Ao Senden Literature Board ajanga tera aka asodaktsüa, mokoteta adoka aliba mapang metok meperi aser mabensaji jenti alitsü akok, ibala mapang ka nung ‘yamai asüba tajungba, tasensaba süla’ ta bilembatem ASLB office tongtsü nung parnokia pelashishia agizüka shisadangtsü südi ta imlar, aser ibala ajanga asen Ao oshi nübu jungdaktsütsü. Tebilemtsü kaji nüngjakoja aser ojang tetezü ya yim shiai balala agütsütsü/ratettsü alinungji teinyakera kanga mangmangkoratsü südi.
Tanü asen oshi tetsüng teben tashi ita akümtsü asoshi apua oa noktaktsü merangdangba mapang ka Tir Yimyim July 17-18, 2015 tapak ana nung Talitemjen Imchen ajanga “Oshi Kaji Taküm, Sadema Indaktsütsüla” ta lemsatepba nung tagitsüa alitsü, itemji ASLB-i shisadangtsü imlar. Iba article nung ASLB ajanga sangdongba I. Sashimeren Aier-i züluba ken nung ‘arür’ dang ‘sarir’ ta amshibaji kanga junger. Tsükchir/arür melena ken nungbo ‘sarir’ ta dang tena arur, tanü asüng onok lanur aikati memetettsü akok, ajisüaka ken nung amshiba ojang tajung aika lir, ajimesüra sama aotsü, tashishitsü agi jembidang ‘keyi’ (tiger) ta jembiaka ken nungbo ‘ju’ ta tena aruba, nisung kolak/mangko dang ken nungbo ‘saku’ ta atenba; aji agi asen Ao oshi junga züsenra aser tamshi shira kanga takar akümtsü nükla nung angur.
Kasa iba article nung shisema aliba ‘scü’ indang ya tawa tanü nungi masü item ojang ya Ao Osep 2005 küm adokba nunga amshia lir, ASLB ajanga ojang melenshia angubaji ni aibelener ka mesüra 2010 küm adokba Tensenyim-I ibai dang. Ano ‘kishiba’ yabo kaket kecha nung amshia mangur, anungji Tensenyim-1 nung ASLB-i tejangja agütsüa meliaka temelenba nung ‘kichiba’ ta ajaba yabo Aori kisüdang ki side nung kishi tilaka yangluba dang ajaba südi ta nibo bilemer, ‘kishi tilaba’ (not main door) saka ‘main’ kishi dang ‘kichiba’ mesüra ‘kishiba’ ta amshira anaprongji kangasa mapet asütsü ama bilemer, kechiyong anaprongji asen Aori kangabo mejembiba oyim amai lir.
Tanabuba “Arüshir Nüngshi Ken” nung Tsüknung Penzü, Dimapur nungi Tir Yimyim July 28-31 tashi nung adokba o ASLB-i July 14 nü sangdongba ana ya meputeper, kechiyong ASLB-i “Akümlir Mongsong” kaket nungi ta shia lir, saka Tsüknung Penzü-ibo “The Architect of Nagaland State” kaket nungi ta shia angur, anungji sangro ka nisung kati zülu sürnung ka Ao kaket aser ka English kaket nungi ta kaket balala nung aliba indang züluteper ta angateter. Anungji Tsüknung Penzü-i züluba onük ajakji tagitsü taka meshili mesüra tamakitsü taka meshitsüli. Saka Aor tantsü tambu shisakar/oshiobener jenti den Aor lanur oshioben (Linguistics) nung Sangpongpi (Doctorate) aika adokdarji item denji tetongteptsüpuri shisa agitepa asen oshioben tajungba nung renloktsü imlaa atar.
Ano ASLB ajanga sangro, otsü, otsünu amala tajungtiba oyim agi tezülur den asüngdangteper metongshitsü, tatsüba akümtsü, mesüra atsülangshitsü ibajia tangsa ta mesüaka kenübo mapa küma aotsü wadang lir ni… ta shisemer.
Tesüsa asen Ao oshi medemshia yanglushiba maparen ya joko maritepi, mapang peria agia, tatsü talang ajak asadanger koba ojangsa bendenloktsü, inoktsü mesüra yanglushitsü lir, joko tangbo Ao nung MA ajangtetera aika lir asünungji Tesenyim-II kanga agia tajungtiba, tabensaba nung adoktsü imlaa atadi aser nüburtema shirnokisa Ao oshi tajungba küma renloknür; ajaki shisa tesadem agi ASLB den yaritepdi ta ayongzüker.