AROKI ANGATETBA ASER TEKÜLAK (2 TIMOTI 2:13-26)

 

“Saka tamachi aser temeshi tasüngdangtepbai rara adokdaktsür ta meteta, itemji tokjang.” (2 Tim. 2:23).

Asenoki aiben bilemba dang nungi aroki angatetba jagi aisü nung kümzüker. Kari shisa kaa ashir, “Kodang aroki metetba jagi tangatetba agütsüdir, tanga tangatetba tebushi!” Khen-khen asenok dang ashir, “Kuli tebushi. Item mapatem nisung shisatsüi angatettsü temerang. Itemi ya Tsüngrem mapa lir.” Saka iba kuliji meshidak kechiaser Tsüngremi asenok nem “tazüokba tanela” agütsü (2 Tim. 1:7). Khristan bendanga agütsüba asenok tangatetba intoksü maja saka tasen kümshitsü aja (Rom 12:1,2). Teinted tamangertemi parnoki ajangshia inyaka aruba nungi tajung aser tamajung bendanga angatetter (Ibri 5:14). Bilemtsü tekolokji Tsüngrem nungi sempet lir. Khristantemji teshisadanger tajung asütsüla.

Pauli Galatia arogo nunger dang tashi jaa arütsü, kechiaser parnoki tanga osangtajung sülen anidak (Gal. 3:1). Parnoki Tanela nung tenzük aser shi jangraba sülen aotsü tenzük (t.3). Ashioktsübaji parnoki angatet aser tamajungba sang nungi jenbu (2 Tim. 2:26). 2 Peter 2 nung Peteri tiyazü tesayurtem indang ashibaji Tasen Lai nung tashi taitiba aser talangtiba lir. 1 Peter 1:13; 2 Peter 3:1 Peteri temulungjang arakzüdaktsü. Anungji temulungjang tetsüngta ka nung alibaji tanelaren masü saka tachi.

Asentenshi kar nungbo, nisungtemi ariteper. Iba dangji Yihuda molusongzü ta bentettsür. 1 Korint nung azüi asangba ama sangteper. Item shiruru olaji Tanela Temeshi ola ta zülur! Khristantem, asenok koleni aor? Asenoki tangatetba mali asü (Mtt. 15:16,17)? Yimyai asenok dang mesayur no? (1 Korint 11:14).

Iba tasen yimya aser tasen jungkai adokba agi asenok telunglen nisung tipmetemdaktsür. Parnok tzü maitba tzüpu, tarok saka takong, “tsünglu maliba mepet” (2 Peter 2:17). Akhi lemangi meyipang; yangji nenok tanela anisüngzük angutsü! (Yer. 6:16).

Paul tesayuba! Tesalonikia 5:21,22

Tendangang – ajak

Agizükang- tajungba

Pilaang- tamajung ajak nungi !  Amen.