Asen Aor-i pi tsüngdang telongjem sayutettsüla

– I . Zülu Pongen, Mongsenbai Ward, Mkg.

Asen Ao kin ya samanir ta ajaki meteta lir. Tamangba nung mezüng tesayur kin, shisaliok (education) nunga mezüng tesayur kin ka lir. Pi kin ajak ya Aor nungiang ya junger ta angazüka arubatem lir. Phom, Konyak, Chang aser Sangtem amala tantsür tamburtembo ajaki Ao meteta lir aser Laishiba züngteter, aser jembiteter, ya asen metsü. Saka lia-liabo oda tanü asüngbo parnoki sorkar school nung tesayurtem aser tanga departmental nunga par lima nungbo parnok tang inyaktsü ta akhanger, ya zünger mapa manguba tebilemtsü ajanga asütsü akok, ano asenoki sorkar postbo par lima nung liaka temelen toktsür asenokbo yangi arua aliba aikati benshia arur. Iba kuli ajanga par den telongjem pilaba aser meketmeseni inyakba ajiteter asü ta bilemer. Ochia aseni sayur, tiyazüa aseni sayur, tangari temulung lemtettsüsa mesayutetba yimya benshia alitsü akok. Akhidang 1970 tejaklen asen Aor-i par lima tesem kar nung pastor bai asen limai Khristmas sodi arua mongnüdang X-mas jelia monger aruba otsüa angazüker, aji parnoki meteta arunung asenok dak ochi samaba ajitetdaktsüogo, iba nungi asenoka aibelen puteter. Ano asenok o asenok tsüngda nunga melangmepu adokba pi dang sayur, timtem adokdang yakta meyaritepi memetet ama sayura, kati ka nüng sena jembiba pi nem metetdaktsüra iba kuli jagi asenok o asenok na mulungjemba meputepba jakla yimya tangar nem ajitetdaktsür.
Reprangang, pi kinbo anüdoklen alir ajak (kin ajak) union ka küma longjemer, kilimenlir ka danga kiburi tim mesüi benshiba metetra aji union-i repranga par/lar kiburji merenshir. Anungji par yimya meteribo kilirjia akümtsübua benshir, ya telongjem akhümji lir, yamaji asenokia inyaktsüla.
Ano asen Aor sasep nung lokti tentet kari pei tebilemba lemsatepnera ken o mangatetep indang angatetner asünungji osangkaket nung masü saka lokti office dangi arua kechi kuliar angatetepa lenir nema ne tangatetbaji lemsatep nungbo iba jagi tajungba leni arua angateteptsü. Aser naia parnok nungi kuli tejangjaji metettsü. Tatishitsü agi, Ao Senden khuret kar alinungbo parnok number nungji tanga tongtepratep nungbo tajungba asütsüba sür nung kuli kecha mangadangi pei bilemba aser lemtetba osangkaket nung onokibo/ozü yimeribo par telokjiang nungiter ta mesüra onokibo tajungbaleni maru tashi senden nung medeni atar tasa zülutepa yagi asenok tsüngda mangatetep ongdang tali alua sayur.
Tamalenbo yimtsü yimbo tashir tangateter yimli metetertem kari ibala ama Ao Senden mesüra tanga lokti kar dak sendakba khuret kar lira office tonga arua asüngdangtepa metetpela shisa lemsatepasa aru, iba jagi metongjemi aliba lenirtemi shisa agütsür danga kanga pelaa liasü. Aser merajembaji rajema aruba jagi timtem aika nungi kümzüka aruogo.
Anungji asen kin asoshi maksü aketba ken o aser melungjemba ken o kar angashira alima meimer, yimli abenertemibo tsüngdong oa office nungji tir tem den lemsatep nungbo kanga ajungtsü ta bilemer aser mepishir.
Osangkaket ya pei bilemba lemsateptsü sabang tajung ka lir. Saka meshisadangi inyakra lendonga keta alinungji bilemdanger asüngdanger inyak nung tajungba asütsü ta tangatetba lemsateper.