Asen dokan

Tanü asüng lima ya tayoker o talir na lima kümogo, anungji asenoka telok ana rongnungji ka nungbosa adentsüsa akümer. Ibayongji asenok talir telok rongnung dena lir kechiyong asenoki ayoktsüsa kecha meinyaktetba dang masü saka asenok sobaliba nung dokan lapoka kechisarina ayokba yimsü aser yimya mali. Iba jagi balaka asenok ajaki ita sen tilaka asüyonga chia alitsü meranger, kechiyong ita sen jagi tangar tayokertem dang asen nüngdak alia chiajema alitsübaji asenok ajaki taküm nung takok tulu angu amai bilemer. Ajisüaka, asenoki jungjunga bilemdangra ita sen nguli ibaji tangar dokan nung agütsüli ta taküm piyong alitsübaji jangramatem aser iba takümji tejakleni aoba taküm ka masütsü. Aji oda, tanübo asenoka shisa tenük terabo lapoka aor asünungji asenoki tangar dang ayoktsüsa mezüsentetaka mesüra meyanglutetaka, tangar dang alizüka ayoktsü asoshi dokan karbo lapoka ayok tenzükogo. Iba denji ano asenok teka agi yangluba oset aser chiyongtsü karbo tayokdak kanga junga yoka angur. Ibaji asenok loktiliba aser rongsenren nung renloka aoba tamaitsü asütsü. Aji oda, tanübo Nagaland nung shishilembadak yimti tulutiba Dimapur nunga Aor chanu aikati pei pei akok shishilembadak tayoker akümtsüsa dokan tapu balala lapoka aoba ngua kanga temulung achir. Item rongnung tang asangurtem kari cement, kari iron rod, kari paint aser kari electrical osettem tsümartem den toktepa ayoktsü tenzükbaji ajak asoshi tayongzükba tulu asütsü. Asenokbo tangang mezüng dokan lapokdanger saka tangar tsümartembo dokan lapoka shishilemba tenzüker joko putu aika arur, anungji parnok den toktepa dokan lapoka inyaktsübaji temelabo masü aser kanga meranga aser kümdanga meinyakra takoksa angutsü. Ajisüaka, asenoka asen lima nung asenokia inyaktettsüba mapa ajak tsümar nem inyakdaktsür asenok tebok tazüng kazütsübaji matumalem mapa asütsü. Atangji, asenoki tangar dang ayoktsüsa kecha mezüsentettsüa akok mesüra mayanglutettsüa akok saka asenoki tayokbo yoktettsü. Aji oda, tsümartemi kiojen yangluba nung nüngdakba osettsüsettem bener arua yoktetra asenokia yoktettsü, tsümartemi tangari züsentetba chiyongtsü yoktetra asenokia yoktettsü. Kechiba asenokbo second süoshi dang ayoktsü ? Asenoki asen nübortem nüngdakba ajak first hand yoktettsü. Tanü asüng balaka alima tilaka dang kümogo. Iba amaji dokan lapoka shishilemba mapa tenzüktsü asoshi tonga oa mejembiaka internet aser mobile phone ajanga tongteprateper senotsüa online ajanga dang agütsüteper. Anungji, tanü putu lanurtem asoshi lima tesem balala nung kechi adoker aser kechi yanglur, itemji bushia bener arua ayoktsü kanga temela kümogo. Ajisüaka, talir asütsüba dang nungibo tayoker asütsü tasakba kechiyong talirtemji tayokertem asoshi chuba aser chubatsürtem amai lir. Ibayongji, asenok ajak dang tsümartemi sahib aser memsahib ta ajar. Ibaji anganüa asenok ajak tsümar dokan nung meteta aser memeteti ashiokdaktsür aser asenok ita sen aser mapa inyakba sen ajak parnok nem agütsür. Iba tia nung jagi asenok nüji angutsü tenzükba mapangji tang lir. Joko, kisüjensütsü atema osettsüset cement, yin, rong aser tanga nüngdak oset ajak Aor lanurtem dokan nung angutsü. Parnok dokan nungjisa oset tasenba, tajungba aser touzük shitak agütsütsü parnok tejangraba aser temulungtetba lir. Cement ya yanglur anogo 90 sülenbo tamajung akümer, ajisüaka asenoki aji memeteti sen tera dalangba agi tsümar dokan nung alitsüa akok, rong (paint) jenjang tasakba to shimer asenoki tsümar dokan purtem nem mezütepdaktsütsü saka tagütsü dangbo parnoki jenjang temelaba to mezüteper pongdangang jenjang tasakba pongdang nung enoker agütsütsü. Iba amaji Kolkata nung yangluba iron rod amai saka Assam nung yangluba iron rod jenjang temelaba agi agütsütsü. Itemji asenoki pelashishia alia ki yanglur alir. Item kitemji tarendaktsüka lir. Joko item nemji mashiokdaktsütsü asoshi Dimapur nung Aor lanurtemi mulungtetogo. Parnoki kodanga asenok talirtem mashioktsütsü. Parnok dokanji asen dokan, anungji tanga nung malii asenok ajaki parnok dokan nungji alidi.