Asenok merükmejuba yimya

Aotsür Aor dak jakla yimya tamajung aika liaka ano tajunga aika lir aser item tajungtem rongnung kaji merükmejuba ya asütsü. Aor ta süra tangari temerük ta bilemer aser angatetter. Aji oda, Aor merükmejuba indang jembidang temulungsentsü merükba nungi tenzüka temang merüka ayuba, süoshi temerük asemba, chiyongtsü temerük achiba, kiojen, kima yimdong, tzübo aser lenmang merüka ayuba indang jembir ta angatetdi. Atangji, Aor merükmejubaji akhi tetsü tebou nungi merükmejua aruba senmang ka masü saka Khristan kümer külenang temesüng nisungtemi sayuba sobaliba aser libaliro yimya lir. Aortemi Khristan yimsü agizükba den külemi ano kaketshisatsü angazükba ajanga mapang tatsüka tsüngda Aor loktiliba aser kija taküm libaliro yimya tanak agi temesüng küma melenshia aobaji tesüngmangtsüka aser kanga tajung liasü. Iba temoatsü nungji tanü tashi Naga nunger rongnung Aor ta asüba agi nümadangteta lir. Aji oda, tanübo Aor chanu ka tzü mechigu, süoshi memerük semer yimdong nung senzüa ngura, pajibo Aor chanu memesük ta tangari ashitsü. Ano, külen Aorbo masü saka tejak tebang jungjunga merükmejur süoshi temerük semer senzüa ngura pajibo Aor mesüker ta tangari jembitsü. Aor majung aser Aor majungba indang aika jembiaka, tanü tashi ano Aotsür Aor merükmejuba agi ajangzükba akhümbo mesamai lir. Aji oda, kiyong ka nung kima yimdong merükmerüker ngura idakjibo Aotsür Aoer alir asütsü ta jembir. Mapa inyakdaka, office ka kecha memerüki ngura, idakjibo Aor mali ama bilemer saka ano office ka kanga junga merüka ngura, ibaji Aor amenba office amato bilemer. Atangji tangbo Khristan yimsü aser kaketshisatsü agi Naga kin ajak tongogo, ajisüaka asenoki tangar Naga kintem den asenok Ao kin sobaliba aser libaliro medemdangra ano tang tashi tepila talangka itta angutsü. Nagaland nung tanga tesemjibo toktsür Kohima nung tang tashi tangar kintem alidakbo metsümeshidak balaka yanglua mangutsü. Ibayongji kiyong aika nung moapu nung metsümeshiba angutsü. Ano, tang tashi Naga kin aika yimkong leper mali, pei alidak kima dang aremba angutsü. Iba jagi, Kohima aser Dimapur nung Naga nunger yimkong asoshi leper mesemteta ayubaji Aor leper amato akümer. Ibayongji, leper merükteta ayutsübajia tangar dang nungibo Aor khuret tuluba akümer. Aji oda, merükmejuba nunga Naga nungertem rongnung Aor lenir asünungji, talisa Dimapur nung Ao Senso Telongjem Dimapuri küm anasemka jakdang nungi tenzüka küm shi October 2 anogo nung tesem tongtibang kar shimteta merükteta amongba mapa ajanga Naga nunger alidak tesem ajak merüka ayutsü ajungshir. Iba jagi taoba hopta nung asenoki iba osangkaket nung ” Sangkümbo Nagaland tesem balala nung Aortemi October 2 nung merükmejuba dak sendakba mapa tasen kar purapiteta inyak nunga koma süla ?” ta asüba tasüngdangba nung bilemdangogo. Iba ama tasüngdangba jagi asenok nem inyaktsü nüngdakba shisatsü (ideas) aika agütsür. Ashiko, office nung inyaker Aor karibo, iba anogo nung pei amenba office takdang aser kima aser temeket merüka amongtsü apitettsüa akok, ano karibo pei alidak mozü ki aser temeket merüktettsütsü bilemtettsüa akok, ano karibo yimkong lenmang kilentsü merükteta amongtsü latettsüa akok. Aji oda, asen ki aser asen kima merüker ta asüdang memeteti asen lima aser asen yimten merüktetter alitsü. Tanü Aor asoshi tekümdangtsü kaji asenoki kechi jembir, aji shitak küma mapa agi inyakba kin ka asütsüla. Aji oda, yimkong nübodoka lenmang lendi kar yanglu aser ano kasa anogo nunga leper merükteta ayu. Item mapa nungji nisung aika arua denogo. Tetezü, ibaji junger ta agizükba tamaitsü lir. Ajisüaka, tekümdangtsü kaji yimkong nübodoka lenmang yanglu aser leper merüktet saka asen jajaba lenmangbo meyanglushi aser asen ki aser kimabo memerük ta asenoki Aortemi Aor memesük litetra, ibaji asenok asoshi maksü aser Naga nunger asoshi takoksa tulu asütsü. Asenok merüka aliba ajanga teti Nagaland merüka lidaktsütsübaji asenok khuret aser mapa asütsüla.