Asenoki bendenba lendong

Alima yimya agi bener arutsüba lendong aika lir. Itemji menoknok, yipru aser tzümetsüng lendongtem asütsü. Item lendong jagi mapang mapang shia tesem tesem nung nisungtem asüama lendong ajuruba osang angashir aser television nunga angur. Iba yimobilem tezüludak nunga oagi Afghanistan aser Jammu & Kashmir len menoknok tulu anokba osang aser Myanmar aser India nungbo tesem aika nung tzümetsüng lendong nung nisung aika timtem takoksa ajuruba osang angashir. Atangji, item lendong nungi kümzüka alitsü asoshi lendong matalokdang renemtsü koka lir saka item ama alima lendongtemjibo nisung tashi agi nokdangtsü makok. Aji oda, item ama nisungi menokdangtetba alima lendong kecha agia Naga lima aser yangi aliba nübortembo memerenshir. Iba kija jagi asenoki anogo shia Tsüngrem tenüng sanga alitsü tetemsü. Ajisüaka, asenoksa shisamakaba aser asenoksa morumoru tasüba küma libaliruba agi asenokbo asenoki yangluba aser bendenba lendong agi takoksa aser timtem tulu ajuruba angur aser ajangshir. Joko, asenok tagitsü onsara meteta aküm aser tenük amur takar akümtsü meranger asünungji, town nung balaka, tsünglu arudang motzü aolena mali kilentzü ajak nembanga nokdanger iba tema nung ki yanglur. Ibaji dang masü akhidang ayong küma tzü yima aliba ajak ali agi tokbanger iba madak ki tululu aser talanglang yangluteper. Ali tilaka nung akhidangbo tzü yima aliba agi ali takong kümdaktsür ki asür asünungji kanga shisakaa yanglur amai aikati bilemtsü. Ajisüaka, iba nisungbajisa shisamakaba aser morumoru tasüba asütsü. Tzünglu arudang motzü agi ayong tulu küma ayimba kilentzü ali agi nembanger yangji ki süra, tzünglu arudang motzü koleni aotsü ? Iba tebilemtsü jagi tanü Dimapur ama lenden lima nung tzünglu mapang tatsüka danga arura kiyong ajak nung motzü agi tzümetsüng kümer timtem aser takoksa ajurur. Iba kasa timtem jagi Kohima aser Mokokchung ama tenem lima nung tzü taodak maka tesem ka nung atsüngdena yur tesüsa tzünen kümer ali aser kiojen ajak okzüka bener alur.Iba kasa lendongji tang Kohima nung Secretariat leni aiba lenmang nung ayong temdangba telonglen laokba pipe ajanga tzü molutet atsüngdena yur tesüsa lenmang ajak okzüka bener oadokbaji ka asütsü. Iba ama lendong ajuruba jagi asenok tarutsü nung shisakaa asen alidak akok tashi iba ama nisungi yangluba timtem lendong mataloktsüsa kümdanga aser wainshin meteta alitsü nüngdaker. Asenoki jungjunga bilemdangra ayong nung dena tzünglu arudang tzü moulutet atsüngdena yur kangshibaji ayong aser kilentsü ali agi nembangba agi dang masü saka ano asenoki polythene bag tamajung aser anakona tamakitsü ajunga kilentsü nung enoka toktsür. Ajisüaka, item polythene bag-temjibo shirepa maor asünungji itemji ali aser long den külemi nangden dangji kilentzü aser ayong dena nokdangtettsüsa akangakanga mejungketa atur. Iba jagi tzünglu arudang ayonglangleni motzü yima moululuteti lenmang dena nungzüka bener aor, apu raksaktsür aser anentsü aludaktsür.Ano, iba amaji ka tzünen kümer ali dena nungzüka moulutetra tzüji mobanga atua akhidang Tuli nung atalokba ama kodanga tzümetsüng marudangba tesem nunga tzümetsüng arur aser tanga Kohima Secretariat lenmang nung atalokba ama asenoki endokba polythene bag-tem agi tzü aolen tangbanga yur tzü tashi jagi lenmang ajakji nungzüka bener aor. Idangji ayong mesüra kilentzü anasa aliba kiojen dena okzüka bener aotsüsa ataloktsü. Item ama asenoki ngua atalokdang tan ser pei alidak nisung shiai ali nung morumoru mesüi teti motzü sademsadema aotsüsa kilentzü sademsadema lapoktsütsü aser kodangsa dokan nungi polythene bag bener arudir, iba nüngdakji temer rongdoktsü mamatsüla. Asenoki dang ayong aser kilentzü nembanga kiojen meyanglura aser polythene bag mashimashi nung meindoki rongdoka endokra, tamangu lendong tulu aika nungi asenoki meteta aser memeteti kümzüktsü.