Bangladesh PM-i Rohingya tebilemtsü atema teyari meshir

Dhaka, September 16 (Agencies): Honibarnü Bangladesh Prime Minister Sheikh Hasina-i Rohingya tebilemtsü asoshi alimai teyari meshitsü atema UN General Assembly-i apusoa ogo.
Tang tashi nungi Myanmar nungi Rohingya nunger 400,000 shi Bangladesh nung jenoka lir.
Hasina’er sorkari asemben tashi Myanmar ambassador jaoka Rohingya indang ken o atema tejashi metetdaktsüba sülen lai UN den ajuruteptsü ao.
New York nung Hasina-i Myanmar alenbangtsü atema takhangba agütsütsü ta lar sorkar osang ka ajanga ashi.
August 25, 2017 nü Myanmar kübok Buddhist nunger teimba sür aliba Rakhine state nung mepetmesü adokba sülen Rohingya Muslims nungertem Bangladesh nung jenoktsü tenzük.
Honibarnü United Nations-i ashiba agi, Bangladesh nung oa jenokertem 409,000 jungogo aser ibaji künü nung nisung 18,000 shi jenokba ama lir.
Bangladesh kübok timtem kanga ajuruba tesemji arrtsü anasa aliba Cox`s Bazar nung lir. Iba tesem nung Rohingya camp balala nung nisung 300,000 tashi talila jenoka lir.
“UN General Assembly nung o jembidang Sheikh Hasina-i Rohingya tebilemtsü lemsateptsü. Lai Myanmar kübok Rakhine state nung ozüng alema mapa inyakba anendaktsütsü atema takhangba agütsütsü aser UN secretary general dang Rakhine-i bushisüngdanger telok ka yoktsü ayongzüktsü” ta prime minister atema otongdar, Nazrul Islam-i ashi.
Foreign Minister A.H. Mahmood Ali-ia “Myanmar sorkar tangsatang Rohingya nunger samatsütsü merangba mapa anenang ta ashitsü atema onoki international pressure agütsütsü.”
Hokolbarnü Bangladesh foreign ministry-i Dhaka nung Myanmar charge d`affaires jaoka Myanmar drones o helicopter-i airspace alema senzüba atema tebilemba lemsatepogo.
September 10 aser 14 anogotem Myanmar-i Bangladesh airspace anema senzü aser iba ya ajanga timtem adoktsü ana nung lir ta ministry-i ashi, saka Myanmar-i iba atema telangzüba kecha magütsü.
Myanmar-i arrtsü anasa landmines rema yutsüba aser item ajanga Rohingya nunger aika poksetba aser yiruba atema Bangladesh sorkarisa aitsüogo.
Bangladesh sorkari tayimtsü anendak nungi Cox`s Bazar tashi foreign relief aid belentsü atema army nem mapa lemzüktsüogo. Parnokisa refugee tem jenoktsü atema ki 14,000 yanglutsü sentong atongogo.
Hasina-i item kiji anogo 10 tsüngda yanglutsü tetuyuba agütsüogo, ta Bangladesh nung disaster management secretary Shah Kama-i osangbener dang ashi.
Ketdangsertemisa Cox`s Bazar nung aliba Buddhist tekülem kitem lendong nungi kümzüka ayutsü atema police talila mapa lemzüktsüogo.