Bilemdangtsüla

~ T. Lima Tzüwar, Ungma Impang, Artang ward.

Tamasa ni aser ozü kibongi Khristmas salem den Yisu temeim salem iba paper azünger ajak dangi abener. Temeim asen Aotsür Aor aser Naga nunger amangba purtem, asen Naga lima ya Khristan lima aser Nagaland ji Khrista asoshi ta nütsüng nübur ajaki jembir asünungji, Khristan lima ka ama alitsü nüngdak aser Khristar arogo nung member kaka alinung asen lima nung tangar tsüngrem mayutsüla aser mekülemtsüla. Nagaland nung yimtsüng aser town kwi lir ajakji Khristar arogo kaka aser member kaka aser Nagaland nung khristan nütsüng noklang nung noklang asünungji Nagatsür, Naga nunger aser asen Aotsür aser Aor mulungjang nung tamanger taküm ka ama alitsüla aser Naga lima tia asoshi asen lima melenshitsü aser yanglushitsü asoshi pei mulungjang nung bilema alitsüla. Na aser pa aser laji Govt. office nung mena ita sen meyirijang nungi lakh tashi chia alitsü aser hajara wala tema kenü nung Rs. 600 tashi bena arua achir masü no(?) Süra aji agi kechiba tenük masünger, aji Tsüngremer temoatsü masü no (?) Kechiba asen Nagaland memeimer.
Minister-tema election matongdang nütsüng nübur mesüzüka taputapu nangzük aser takok meshitsü. Saka adokerbo pai nangzükbatem amadoktsü. Oda An-ia pa tepok sünga pai kozüba scü chir mesütok ama minister küm 10-15 tashi inyakdang ochimashi mapa kecha meinyak ama jembir.
Temeim asen Aotsür Aortem, November 1 nungi 3 aonung tashi asentenshi tulu ayongzüka tongti o jembirtemi asenok dang asen taküm melenshitsü aser kibong melenshitsü asoshi Tsüngrem o tera tena kakteta ashibatu mamadoki lir ma ? Aser temulungjang merüka lidarma ? Iba asentenshi tatem aonung tashi nung nisung merijang aika arua pei tai nangzüktepogo. Iba mungdang ki yanglutsü atema yim aikati süngküm tenlaogo aser sen-a kanga tenlaogo aser nübua jenti arua temeim mapa inyakogo. Rongsen jenti laluogo anungji asen Aotsür Aortem asenoki Tsüngem tsüngdang asen menen nangzüka yamaji asen mulungjang yanglushidi arungma. Aji mesüra aseni makoktsüsa timtem arutsü, anungji asen Teyanglur Tsüngem mejashidaktsütsü merangdi arungma.
Temeim Naga lima nung amangba purtem aser asen tzükong terok nung aliba nütsüng nübur amangba purtem, ken kaket nungbo mali, saka ken zülur aser mejemertemi atoktsüba ken nung yamai ashir, “tenük merem agi sünger, mokokaji sünger, ochimashi agi sünger kotaki aotsübo yongyar, ibaji na asü, nai kotak ngunerma, nai amanga lir ma? Nai aji ngutettsüsa nü takümji kümdangang, mekümdangra amangba pur jenti molumi-i aotsü ta ashibaji koda tesasatsü. Ken dena lai zünga molumi jagi maotsüsa asen mulungjang nung teti asen Teyanglur Tsüngrem lidaktsüdi. Mojing tanülai asen mulungjang matidangtsü asoshi tali sarasadem nung bendi arung ta amangba pur ajak ayongzüker.