BJP-i linük amokbangtsü akok

Election Commission of India (ECI)-i Nagaland, Tripura aser Meghalaya nung assembly elections agitsü anogotem sangdongba sülen BJP-i Northeast nungi Congress atsüngdoktsü atema mapa inyakba asentenshir tuluba nung inyaktsü tenzükogo. 2014 küm tashi Assam, Arunachal Pradesh, Meghalaya aser Mizoram nung Congress sorkartem kümteta liasü aser Tripura o Nagaland nunga opposition tongti liasü. Ajisüaka, Narendra Modi-i Prime Minister menden nung amenba aser BJP tir Amit Shah-i linük nung BJP ulushitsü atema alizüng yur mapa inyakba ajanga Northeast nung yimtenren tsütsü temelenshi aika adoka liasü. Assam, Nagaland aser Arunachal Pradesh state tem NDA teloktep nung dena lir aser BJP-i northeast state balala nung local party tem mesüzüktsü aser tesentaktep yanglutsü atema mapa inyaka arudar. Tsüklai 18, 2018 nü assembly election agitsü aliba Tripura state nung BJP-i lisopur telok IPTF den tesentaktep yangluogo aser ano Indigenous Nationalist Party of Twipra (INPT) dena tesentaktep yanglutsü atema jembishinü südar ta osang angazüker. CPM-i küm 25 tashi tanen makai sorkar ketdangsüa aruba atsüngdoktsü nükjidong nung BJP-i Tripura nung kanga meranga mapa inyakdar. Meghalaya nunga Tsüklai 27, 2018 nü assembly election agitsü osang metetdaktsüogo aser iba state nunga Congress MLA kari party toktsür BJP den denogo. Iba ajanga Meghalaya nung BJP raloka aoba kuli sayur. Nagaland nung Tsüklai 27, 2018 nü assembly election agitsübo sangdongogo saka Naga kin hohotemi anir Naga yimten teloktem aser political party temi election masü Naga yimten tamasa latetang ta takhangba agüja election thinentsü atema ola adoker. Anungji tang tashi nungbo election agitsü asü magitsü’ar meshiteti lir. Ajisüaka, Nagaland nung kümteta aliba DAN teloktep sorkar nung BJP dena lir aser iba jagi taruba assembly election agira BJP-i jenjang tajung angutsü akok ta bilemer. Centre nung BJP sorkar aliba ajanga parnok tajangzük kanga angur kechiyong yimya agi northeast state temi Centre dak nungiang senotsü angutsü atema teimla ayur aser yamaji inyaksangshia arur. Rajasthan, Madhya Pradesh aser Chhattisgarh state tem nungbo Congress tashi taitba akümba ajiteter aser item state nung BJP sorkartem kümteta lir. Iba ya BJP atema khuret ka aser tayongzükba tulu ka lir. Madhya Pradesh nung Congress-i civic elections nung takok tulu ngua liasü saka BJP-i ibaji taküm küm tatemlen assembly election agitsü aliba atema “semi-final” ka dang liasü ta metetdaktsüogo. Maneni Gujarat assembly election nunga Congress-i menden aika nung takok nguteta liasü. Rajasthan, Madhya Pradesh mesüra Chhattisgarh nung Congress jenjang tajungba akümbaji BJP mesüra BJP-i aniba sorkartemi rongsenkettsüng aser sorkar timi ketdang mesütetba, mapa magütsütetba aser aluyimertemi timtem ajurubatem ajanga alitsü akok saka state asemprongla nung BJP sorkartem lir aser parnok atsüngdoktsüji tasak asütsü. 2018 aser 2019 nung state 17 nung assembly elections agitsü sentong lir aser iba denji sangküm Lok Sabha elections-a agitsü lir. State ka sülen ka ta melentepa assembly elections agiba nung timtem ajuruba aser kanga anibelemba agi Narendra Modi-i elections ajak kasa mapang ka nung agitsü indang tebilemba ka metetdaktsüogo. Iba jagi Karnataka, Meghalaya, Tripura aser Nagaland nung BJP-i takok tajung ngutetra Parliament aser BJP-i kümteta aliba state sorkartem kümsük metembangdangsa anener elections ajak kasa mapang ka nung külemi agia BJP-i linük ajunga madak ketdangsüa aotsü meteta mali.