Boney M telok Nagaland-i arutsü

Kohima, November 7 (TYO): Taküm December ita Germany nungi Boney M pur Nagaland-i arua shilem agitsü. Hornbill Festival nung shilem ka ama December 10 nü IG Stadium Kohima nung parnoki ken atentsü.
Mongulbar nü Rattle and Hum nung osangbener senden ka amendang, Nagaland Outdoors Club (NOC) Convenor, Kethosituo Elvis Mepfuo-i Boney M arutsü indang osang metetdaktsü.
Boney M nung tongti kentener Liz Mitchell aser tangartemji December 9 nü Nagaland tonga arutsü. Iba sentong ya ‘Christmas with Boney M’ ta jatetogo aser parnoki 80s aser 90s nung atenba nüngtugu kentem atentsü.
November 13, 2017 nungi Boney M kenten sentong indang ticket ayok tenzüktsü aser +91 9089350469 ajanga ticket mekazüka ayutsü akok, ta Elvis Mepfuo-isa ashi.
Boney M indang kenten sentong ticket jenjangji- Gold Card Rs 10,000 aser iba nung nisung ana den car pass angutsü aser general category – Rs 1000 asütsü.
Telemsa anaprong nungi lucky ticket holders nisung pungugui Boney M den külemi chiyungtsü atema maongka angutsü, ta Elvis-isa ashi
State sorkari International Rock Contest ji Dimapur nung agitsü atema belentsü saka Boney M indang kenten sentongjibo Kohima nung dang alitsü, ta paisa shisem.
Sorkari Rock Contest ji Kohima nung security aser traffic timtemtem ajanga Dimapur-i belentsü ta ashir saka Dimapur jia Kohima den kecha tepila mali. Ajisüaka, Hornbill Festival ya state kübok tesem balala nung amungtsü tenüng nung belentsüla, ta Elvis-isa metetdaktsü.